იაპონელ ქალებს ქართული ღვინო მოეწონათ

თბილისი, 22 თებერვალი — Sputnik. ქართულმა ღვინოებმა ღვინის საერთაშორისო კონკურსზე Japan Women's Wine Awards ცხრა ჯილდო მიიღეს — ორმაგი ოქრო, ოთხი ოქროსა და ოთხი ვერცხლის მედლები, განაცხადეს საქართველოს ღვინის ეროვნულ სააგენტოში.

საერთაშორისო კონკურსი „საკურა“ მასშტაბური ღონისძიებაა. საკონკურსო ჟიურიში იაპონიაში ღვინის სფეროში დაკავებული ქალბატონები არიან — სომელიეები და ღვინის მწარმოებლები, ღვინის საკითხებზე მომუშავე ჟურნალისტები, ღვინის იმპორტიორები.

ორმაგი ოქრო კომპანია „კახურის“ „საფერავი რეზერვი 2005“-მა მიიღო. ამავე კომპანიის „საფერავი 2008“-მ ოქრო მოიპოვა. ოქროს მედლები ასევე მიიღეს ღვინოებმა: „საფერავი. საოჯახო რეზერვი. 2013“, კომპანია „ლუკასი“; „მარანი. კონდოლის ვენახები. სამი. 2013“, კომპანია „თელავის ღვინის მარანი“; „მარანი. რეზერვი. 2007“ კომპანია „თელავის ღვინის მარანი“.

ვერცხლი ერგოთ შემდეგ ღვინოებს: მუკუზანი იბერიული. 2013“, კომპანია „შუმი“.

„ნაფარეული. 2013“, კომპანია „შუმი“; „სატრაპეზო საფერავი. 2012“, კომპანია „თელავის ღვინის მარანი“; „საფერავი ქვევრის. 2011“, კორპორაცია „ქინძმარაული“.

წელს ამ გამოფენაზე საკუთარი პროდუქცია 35-მა ქვეყანამ წარმოადგინა.
ორმაგი ოქროთი დაჯილდოებული ღვინოები წარდგენილი იქნება კვების პროდუქტებისა და სასმელების საერთაშორისო გამოფენაზე FOODEX JAPAN 2016. ღონისძიების ფარგლებში 8 მარტს წარდგენილი ღვინოები Diamond Trophy-ს ჯილდოსთვის იბრძოლებენ.

„მსგავს ღონისძიებებში წარმატება კიდევ უფრო ხელს შეუწყობს ქართული ღვინის პოპულარიზაციასა და დამკვიდრებას, არა მარტო იაპონიის, არამედ ზოგადად აზიის ბაზარზე“, — განაცხადეს სააგენტოში.
ქართული ღვინის ექსპორტი ისეთ სტრატეგიულ ბაზარზე, როგორიც იაპონიაა, გასულ წელს, 2014 წელთან შედარებით, 5%-ით გაიზარდა და 138,3 ათასი (0,75 ლიტრი) ბოთლი შეადგინა. სულ 2015 წელს მსოფლიოს 46 ქვეყანაში ექსპორტირებული იყო 98,1 მლნ აშშ დოლარზე მეტი ღირებულების დაახლოებით 36,1 მლნ ბოთლი ქართული ღვინო.