თბილისი, 18 თებერვალი — Sputnik. სირიელი თვითმკვლელი-ტერორისტი სალიჰ ნეჯარი, რომელიც თურქეთში ლტოლვილის სტატუსით ჩამოვიდა, ანკარაში ტერაქტის მოწყობაშია ეჭვმიტანილი. სამშაბათს მომხდარი ტერაქტისას 28 ადამიანი დაიღუპა, ხოლო 61 — დაიჭრა, იუწყება ხუთშაბათს საინფორმაციო სააგენტო „რია ნოვოსტი“ გაზეთ Yeni Safak-ზე დაყრდნობით.
დანაღმული ავტომანქანა თურქეთის დედაქალაქის ცენტრში, პარლამენტისა და გენშტაბის შენობების მახლობლად, თბილისის დროით 20:31 წუთზე აფეთქდა, აფეთქება მაშინ მოხდა, როცა შუქნიშანზე სატვირთო ავტომობილი გაჩერდა, რომელსაც გენშტაბის პერსონალი — თურქი სამხედროები გადაჰყავდა. ტერაქტს ძირითადად სამხედრო მოსამსახურეები ემსხვერპლნენ. დაშავებულთა შორის არიან ანკარის მცხოვრებნიც, რომლებიც იმ დროს შემთხვევის ადგილზე იმყოფებოდნენ.
ანონიმური წყაროს ინფორმაციით, ტერორისტის იდენტიფიცირება თითების ანაბეჭდების მიხედვით მოახერხეს, რომელიც მას ლტოლვილის სახით რეგისტრაციისას აუღეს.
როგორც ხუთშაბათს გაზეთი Sabah-ი იუწყება, ავტომობილი Volkswagen, რომელიც ანკარის ტერაქტისას გამოიყენეს, დაახლოებით ორი თვის წინ ბურსაში იქირავეს, მაგრამ დამქირავებელმა პირებმა ის დათქმულ ვადაში არ დააბრუნეს. კომპანიამ პოლიციას ავტომანქანის ქურდობის განცხადებით მიმართა. ამის შემდეგ ავტომანქანა იძებნებოდა. გაირკვა, რომ ავტომობილი ათი დღის განმავლობაში ყალბი სანომრე ნიშნებით ანკარაში იყო. გარე სათვალთვალო კამერების შესწავლამ დაადგინა, რომ 11 თებერვალს მანქანა იმ რაიონში იმყოფებოდა, სადაც ექვსი დღის შემდეგ აფეთქება მოხდა.
