თბილისი, 17 თებერვალი — Sputnik. საქართველოს პრემიერ–მინისტრმა დაგეგმილი საგადასახადო რეფორმის ფარგლებში საბიუჯეტო ხარჯების შემცირებას ერთ–ერთი უმნიშვნელოვანესი ფაქტორი უწოდა ლარის კურსის გამყარების კუთხით.
„ადმინისტრაციული და სხვა სახის ხარჯები 350–400 მილიონი ლარით მცირდება და ლარზე ზეწოლა ამ თვალსაზრისით შემცირდება“, — განუცხადა პრემიერმა ჟურნალისტებს.
მისი თქმით, ასევე დიდი მნიშვნელობა ენიჭება იმ ნაბიჯებს, რომლებსაც მთავრობა ვიზიტორების გაზრდის მიმართულებით დგამს.
„ჩვენ გვაქვს კონკრეტულად გაწერილი გეგმა, თუ რა ნაბიჯები უნდა გადაიდგას ამ მიმართულებით — იქნება ეს ირანთან სავიზო რეჟიმის გაუქმება, დამატებითი რეისები თუ სხვა“, — თქვა პრემიერმა.
შეგახსენებთ: საგადასახადო სისტემის რეფორმა ე.წ. „ესტონურ მოდელზე“ გადასვლას გულისხმობს. კერძოდ, აღნიშნული მოდელის მიხედვით, მოგების რეინვესტირების შემთხვევაში, კომპანიები მოგების გადასახადს არ გადაიხდიან. მოგება დაიბეგრება მხოლოდ მისი განაწილების, დივიდენდად გაცემის შემთხვევაში. მოქმედი საგადასახადო კოდექსის თანახმად, მოგების გადასახადის მოცულობა 15%-ს შეადგენს.
კანონპროექტის თანახმად, გადამხდელებს, რომელთაც აქტივობები არ უფიქსირდებათ, 2011 წლის 1 იანვრამდე წარმოშობილი და გადაუხდელი დავალიანების თანხა ჩამოეწერებათ.
