თბილისი, 16 თებერვალი — Sputnik. ვაშინგტონში 2016 წლის გაზაფხულზე ბირთვული უსაფრთხოების სამიტზე ქართულ დელეგაციას საქართველოს პრეზიდენტი გიორგი მარგველაშვილი უხელმძღვანელებს, განუცხადა ჟურნალისტებს სახელმწიფოს მეთაურის მრჩეველმა საგარეო საქმეთა საკითხებში თენგიზ ფხალაძემ.
მანამდე, აშშ-ის პრეზიდენტმა ბარაკ ობამამ სამიტზე საქართველოს პრემიერი გიორგი კვირიკაშვილი მიიწვია. თუმცა მთავრობის მეთაური ამ ღონისძიებაზე არ წავა.
„მთავრობასთან კონსულტაციის შედეგად გადაწყდა, ქვეყნის ინტერესებიდან გამომდინარე, მნიშვნელოვანია, რომ საქართველო ქვეყნის პრეზიდენტმა წარადგინოს, შესაბამისად, ამ სამიტზე საქართველოს პრეზიდენტი გაემგზავრება“, — განაცხადა ფხალაძემ.
სამიტში მონაწილეობის გარდა, მარგველაშვილი ვაშინგტონში ორმხრივ შეხვედრებს გამართავს.
სამიტი აშშ-ში 2016 წლის 31 მარტს — 1 აპრილს ჩატარდება. მასზე განიხილავენ ბირთვულ საფრთხეებსა და გზებს გამდიდრებული ურანის გამოყენების შემცირებისკენ.
