თბილისი, 13 თებერვალი – Sputnik. საქართველოს თავდაცვის მინისტრმა თინათინ ხიდაშელმა ფინელ კოლეგასთან იუსი ნიინისტესთან (Jussi Niinistö) შეხვედრა
მიუნხენის რიგით 52-ე უსაფრთხოების კონფერენციის ფარგლებში გამართა, იუწყება თავდაცვის სამინისტროს პრესსამსახური.
შეხვედრაზე ყურადღება გამახვილდა რეგიონული უსაფრთხოების საკითხებსა და არსებულ გამოწვევებზე.
„თქვენთვის ცნობილია, რომ ჩვენ, ფინეთი, ავსტრალია და შვედეთი ერთ ჯგუფში ვართ (ნატოს პარტნიორები — რედ.) და ფინეთთან ურთიერთობა შეიძლება იყოს ყველაზე უფრო მომგებიანი და გამოსადეგი თავდაცვისუნარიანობის გაძლიერების მიზნით“, — ციტირებს მინისტრის სიტყვებს საქართველოს თავდაცვის უწყება.
საქართველოს დელეგაცია, პრემიერ-მინისტრ გიორგი კვირიკაშვილის ხელმძღვანელობით, პარასკევს მიუნხენში უსაფრთხოების კონფერენციაში მონაწილეობის მისაღებად გაემგზავრა.
მიუნხენის კონფერენციაზე სიტყვით გამოვა საქართველოს პრემიერ-მინისტრი გიორგი კვირიკაშვილი.
საქართველოს პრემიერი უკვე შეხვდა ბულგარეთის პრეზიდენტს, ჩერნოგორიის პრემიერ-მინისტრსა და ევროპული დიპლომატიის პირველ პირებს.
საქართველოს დელეგაციის ვიზიტი 14 თებერვალს დასრულდება.
