თბილისი, 9 თებერვალი — Sputnik. საქართველოს სახალხო დამცველმა უჩა ნანუაშვილმა თავის ყოველწლიურ ანგარიშში ის სამინისტროები და უწყებები დაასახელა, რომელთაც 2015 წელს არ შეასრულეს მისი რეკომენდაციები.
მათ შორისაა საქართველოს მთავრობა, იუსტიციის სამინისტრი და უზენაესი სასამართლო. გარდა ამისა, ომბუდსმენის ანგარიშში ნათქვამია, რომ რეკომენდაციებზე პასუხი არ მოსვლიათ პრობაციისა და სასჯელაღსრულების სამინისტროსგან, კულტურისა და ძეგლთა დაცვის მინისტრისაგან, ეკონომიკისა და მდგრადი განვითარების მინისტრისაგან, ასევე იუსტიციის უმაღლესი საბჭოს მდივნისაგან.
სახალხო დამცველის მიერ გაგზავნილი 80 რეკომენდაციიდან შესრულდა 40 (50%), ნაწილობრივ შესრულდა 14 (17%), პასუხი არ მოვიდა 26 (33 %) რეკომენდაციაზე.
„2015 წელს საქართველოს სახალხო დამცველის რეკომენდაცია/წინადადებების რაოდენობა შემცირდა…ამასთან, უნდა აღინიშნოს, რომ სხვადასხვა უწყებები ადეკვატურად რეაგირებდნენ სახალხო დამცველის მიმართვებზე და ადამიანის დარღვეული უფლებების აღდგენა ხდებოდა სახალხო დამცველის მიერ საქმის შესწავლის დაწყების ფარგლებში, რაც აღარ ქმნიდა რეკომენდაცია/წინადადების მომზადების აუცილებლობას“, — ნათქვამია სახალხო დამცველის ანგარიშში.
იქვე აღნიშნულია, რომ წინა წლების მსგავსად, კვლავ მაღალია მიმართვიანობა საქართველოს მთავარი პროკურატურისადმი — 22 რეკომენდაცია/წინადადება, რომლიდანაც აბსოლუტურ უმრავლეს შემთხვევაში სახალხო დამცველი შესაძლო არასათანადო მოპყრობის ფაქტებთან დაკავშირებით გამოძიების დაწყებას მოითხოვდა.
