თბილისი, 7 თებერვალი — Sputnik. რუმინეთის პარლამენტის დეპუტატთა პალატის თავმჯდომარე ვალერიუ შტეფან ზგონეა საქართველოს 7 თებერვალს ეწვევა და უმაღლესი დონის შეხვედრებს გამართავს, — იუწყება ქართული მედია საქართველოს პარლამენტზე დაყრდნობით.
ორი დღის განმავლობაში ზგნოია, დელეგაციის წევრებთან ერთად, შეხვდება სრულიად საქართველოს კათალიკოს–პატრიარქ ილია მეორეს, პრეზიდენტ გიორგი მარგველაშვილს, პრემიერ–მინისტრ გიორგი კვირიკაშვილს, პარლამენტის თავმჯდომარე დავით უსუფაშვილსა და საგარეო საქმეთა მინისტრ მიხეილ ჯანელიძეს.
საქართველოში ვიზიტის ფარგლებში რუმინეთის პარლამენტის დეპუტატთა პალატის თავმჯდომარე ქვეყნებს შორის ურთიერთგაგების მემორანდუმზე ხელმოწერას გეგმავს.
რუმინელი სტუმრები დაათვალიერებენ საქართველოს ეროვნული მუზეუმის საგანძურსა და ძველი თბილისის ღირსშესანიშნაობებს.
რუმინეთის დელეგაცია ქვეყანას 9 თებერვალს დატოვებს.
