თბილისი, 3 თებერვალი — Sputnik. პრეზიდენტის გამოსვლაში ძირითადი აქცენტი საქართველოს ევროპულ და ევროატლანტიკურ ინტეგრაციაზე გაკეთდა, — მიაჩნია გლობალური კვლევების ცენტრის ხელმძღვანელს ნანა დევდარიანს.
„პოზიტივია რომ საქართველოს პრეზიდენტმა თავის გამოსვლაში რუსეთთან დიალოგის თემაზე საერთოდ ილაპარაკა. ძირითადი აქცენტი ევროპულ და ევროატლანტიკურ ინტეგრაციაზე მოდიოდა”, — აღნიშნა ნანა დევდარიანმა.
ნანა დევდარიანს პარლამენტში გიორგი მარგველაშვილის მოხსენებამ ისეთი შთაბეჭდილება შეუქმნა, რომ ძალიან კეთილდღეობაში მყოფი ევროპული სახელმწიფოს პრეზიდენტი გამოდიოდა.
„პირველ რიგში პრეზიდენტის ეს ყოველწლიური მიმართვა მაინც გათვლილი უნდა იყოს არა მხოლოდ დეპუტატებზე, არამედ მოქალაქეებზეც. გამიჭირდება გითხრათ, რა თქვა მან დღეს ისეთი, რაც ჩვენი მოსახლეობის ყოველდღიურ გაჭირვებას ეხება, ამიტომ, პრეზიდენტის გამოსვლა არ იყო ქვეყენაში ბოლო დროს შექმნილი მდგომარეობის ადეკვატური“- მიაჩნია ნანა დევდარიანს.
მარგველაშვილის ყოველწლიურ გამოსვლას პარლამენტშისაქართველოს ახალი პრემიერ-მინისტრი გიორგი კვირიკაშვილი, ვიცე-პრემიერი კახა კალაძე და მთავრობის სხვა წევრები ესწრებოდნენ.
აქამდე მთავრობა, მარგველაშვილისა და ყოფილი პრემიერის ირაკლი ღარიბაშვილის არამდგრადი ურთიერთობების ფონზე, პარლამენტში პრეზიდენტის გამოსვლებს არ ესწრებოდა.
საგაზაფხულო სესიაზე პარლამენტის 150 დეპუტატიდან რეგისტრაცია 107-მა გაიარა.
