თბილისი, 29 იანვარი — Sputnik. საქართველოს შეიარაღებული ძალების პრესტიჟი უნდა დავიცვათ, განაცხადა პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა ადამიანის უფლებათა საკითხებში გაეროს უმაღლესი კომისარის ზეიდ რაად ალ ჰუსეინის მიერ პარასკევს გაავრცელებული განცხადების კომენტირებისას, იმაზე, რომ 2014 წელს დაზარალებულმა ცენტრალური აფრიკის მოქალაქეებმა, გაეროს წარმომადგენლებს მოუთხრეს უცხოელი სამხედროების მხრიდან გაუპატიურების ფაქტებზე. ამასთან სამმა დაზარალებულმა ქართველ სამხედროებზე მიუთითა.
გამოძიება უნდა დასრულდეს, ჩვენ ამ საკითხს ძალიან სერიოზულად ვაკვირდებით, გამოძიება სრულფასოვნად უნდა ჩატარდეს და შემდგომ თუ ვინმე იქნება დასასჯელი აუცილებლად მოუწევს პასუხისმგებლობა. მთავარია დავიცვათ ჩვენი სამხედროების პრესტიჟი. ყველა სამხედროს, ყველა ოფიცრის უფლება დაცული უნდა იყოს და ამ კონტექსტში ჩვენ დასკვნებს გამოძიების დასრულების შემდეგ გავაკეთებთ“, — თქვა სესიაშვილმა.
გამოძიების დასრულებამდე, საქართველოს თავდაცვის მინისტრის ბრძანებით, დაკავებული თანამდებობიდან განთავისუფლდა ყველა ის პირი, რომლის პირდაპირი ვალდებულება იყო 2014 წლის ფაქტების გამოძიება.
ქართველი სამხედროები ცენტრალური აფრიკის რესპუბლიკაში ევროკავშირის ეგიდით სამშვიდობო მისიაში 2014 წლის ივლისიდან იღებენ მონაწილეობას.
