თბილისი, 29 იანვარი — Sputnik. საქართველოს სოფლის მეურნეობის სამინისტროს სურსათის ეროვნულმა სააგენტომ უარყო ინფორმაცია იმის თაობაზე, თითქოს საქართველოში წვრილფეხა რქოსან პირუტყვში ცხვრის კატარალური ცხელებაა (Bluetongue) გავრცელებული.
მანამდე საინფორმაციო სააგენტო „აზერი პრესის“ ვებგვერდზე გამოქვეყნდა ინფორმაცია, რომ აზერბაიჯანი დროებით ოფიციალურად აკრძალავს საქართველოდან ცოცხალი საქონლისა და ხორცის პროდუქციის იმპორტს.
წლის დასაწყისში თბილისის მახლობლად ცხვრების დახოცვისთანავე სურსათის ეროვნულმა სააგენტომ ვეტერინარული და ეპიდემიოლოგიური შემოწმებები ჩაატარა. დამატებითი სინჯები ცხოველთა ჯანდაცვის მსოფლიო ორგანიზაციის რეფერალურ ლაბორატორიაში (დიდი ბრიტანეთი) გადაიგზავნა.
შემოწმებით დადგინდა, რომ ცხვრებში ინფექციური დაავადება არ ფიქსირდება, რის შესახებაც ქართულმა მხარემ აზერბაიჯანსაც შეატყობინა.
