თბილისი, 25 იანვარი — Sputnik. ჩინეთი ტვირთის ჩინეთიდან ევროპაში გადაზიდვის თაობაზე უკრაინის მიერ შეთავაზებულ მარშრუტს (რუსეთის გვერდის ავლით),როგორც „აბრეშუმის გზის“ ეკონომიკური სარტყლის მშენებლობის ფარგლებში ვაჭრობის შემოღების ერთ-ერთ ვარიანტს, მიესალმება, განაცხადა ორშაბათს ჩინეთის საგარეო საქმეთა სამინისტროს ოფიციალურმა წარმომადგენელმა ხუა ჩუნინმა.
მანამდე აზერბაიჯანმა, ყაზახეთმა, საქართველომ და უკრაინამ ხელი მოაწერეს ოქმს კონკურენტუნარიანი შეღავათიანი ტარიფების შესახებ ტრანსკასპიური საერთაშორისო სატრანსპორტო მარშრუტით — ე. წ. აბრეშუმის გზით, რუსეთის გვერდის ავლით, ტვირთის გადაზიდვის თაობაზე.
„რა შეეხება უკრაინული მხარისა და სხვა ქვეყნების წინადადებას ახალი სატრანსპორტო მარშრუტის შესახებ, ჩინური მხარე ასევე მიესალმება“, — განაცხადა ხუა ჩუნინმა კითხვაზე პასუხისას.
მან ასევე აღნიშნა უკვე არსებული სატრანსპორტო მარშრუტების მნიშვნელობა, რომელთაგან ერთ-ერთი ტრანსციმბირულ მაგისტრალზე გადის.
რუსეთმა 1 იანვრიდან შეუჩერა უკრაინას დსთ–ს თავისუფალი ვაჭრობის ხელშეკრულების მოქმედება და საბაჟო მოსაკრებელი დააწესა ევროკავშირიდან ნაკადად წამოსული დაუბეგრავი საქონლისგან საკუთარი ბაზრის დაცვის მიზნით. ამას გარდა, უკრაინას კვების პროდუქტებზე ემბარგოც დაუწესა, როგორც ანტირუსული სანქციებისთვის მხარდამჭერ ქვეყანას. რუსეთის პრეზიდენტის ბრძანებულების თანახმად, უკრაინიდან ყაზახეთში სატვირთო გადაზიდვები რუსეთის გავლით მხოლოდ ბელარუსის ტერიტორიიდან უნდა განხორციელდეს და თანაც მხოლოდ სანავიგაციო სისტემა „გლონასის“ მეშვეობით.
