თბილისი, 21 იანვარი — Sputnik. ორი მსხვილი საინვესტიციო კომპანია Washington State Investment Board და Tata Sons LTD საქართველოში ინვესტიციებით არიან დაინტერესებულნი, აღნიშნულია მთავრობის პრესსამსახურის განცხადებაში.
საქართველოს პრემიერ-მინისტრმა გიორგი კვირიკაშვილმა დავოსის მსოფლიო ეკონომიკური ფორუმის ფარგლებში ორივე კომპანიის წარმომადგენლებთან შეხვედრები გამართა და გარკვეულ შეთანხმებებს მიაღწია.
Washington State Investment Board-ის აღმასრულებელ დირექტორთან ტერეზა ვიტმარშთან (Theresa J. Whitmarsh) შეხვედრისას გადაწყდა, რომ კომპანიის სამუშაო ჯგუფი საქართველოს ეწვევა. შეხვედრაზე ასევე იმსჯელეს ბიზნეს-გარემოს საკითხებსა და ენერგეტიკასა და უძრავ ქონებასთან დაკავშირებულ პროექტებზე. პრემიერ-მინისტრმა შეხვედრაზე აღნიშნა საქართველოს მნიშვნელოვანი გეოგრაფიული მდებარეობა, ლიბერალური და ევროპაში ერთ-ერთი ყველაზე დაბალი გადასახადები, რაც ინვესტორებისთვის მიმზიდველია, ნათქვამია განცხადებაში.
რაც შეეხება კვირიკაშვილის შეხვედრას კომპანია Tata Sons LTD-ის თავმჯდომარე საირუს მისტრისთან (Cyrus P Mistry), აქ კომპანიის მიერ ინვესტიციების გაზრდის თაობაზე შეთანხმება იქნა მიღწეული. საირუს მისტრიმ განაცხადა, რომ ბიზნეს-გარემოს გასაცნობად საქართველოში ჩამოსვლას აპირებს.
Tata Group საქართველოში ინვესტიციებს უკვე ახორციელებს. კერძოდ, კომპანია მდინარე აჭარისწყალზე 600 მლნ აშშ დოლარის ღირებულების ჰიდროელექტროსადგურის მშენებლობის პროექტის მონაწილეა.
