თბილისი, 20 იანვარი – Sputnik. საქართველოს პროკურატურა რადიო „საქართველოს ხმის“ დამფუძნებლის ბიძინა კუჭავას თვითმკვლელობის საქმის გამოძიებაში დამოუკიდებელი ექსპერტის ჩართვისთვის მზადყოფნას გამოთქვამს.
კუჭავას ოჯახის წევრები და ახლობლები გამოძიების ოფიციალურ ვერსიას არ ეთანხმებიან, რომლის მიხედვითაც ბიზნესმენმა სამეგრელო-ზემო სვანეთის უფროსი პროკურორი ვახტანგ ქირია მოკლა და შემდეგ თვითმკვლელობით დაასრულა სიცოცხლე.
„პროკურატურა მზადაა დამოუკიდებელი ექსპერტი მაია ნიკოლეიშვილი, რომელიც კუჭავას ოჯახმა მოიწვია, ოფიციალურად ჩართოს სასამართლო-სამედიცინო ექსპერტიზის პროცესში“, — ნათქვამია მთავარი პროკურატურის განცხადებაში.
უწყების ინფორმაციით, პროკურატურა აქტიურ თანამშრომლობას გეგმავს როგორც კუჭავას ოჯახის წევრებთან და ადვოკატთან, ისე ვახტანგ ქირიას მხარესთან.
სამეგრელო-ზემო სვანეთის უფროსი პროკურორი ვახტანგ ქირიას ცხედარი, მისი გაუჩინარებიდან სამ დღეში, 16 იანვარს, ბიძინა კუჭავას მიერ დაქირავებულ ბინაში იპოვეს.
