თბილისი, 16 იანვარი — Sputnik. პატიმრობაში მყოფმა თბილისის ყოფილმა მერმა გიგი უგულავამ ინფორმაცია მეუღლესთან განქორწინების შესახებ ფეისბუქით გაავრცელა.
თბილისის საქალაქო სასამართლომ უგულავა 2009-2010 წლებში სახელმწიფო სახსრების გაფლანგვაში დამნაშავედ სცნო. საუბარია თბილისის მერიასთან არსებული კომპანია „თბილსერვის ჯგუფში“ მაშინდელი მმართველი პარტია „ერთიანი ნაციონალური მოძრაობის“ აქტივისტებისთვის ფიქტიური საამუშაოების შექმნაზე.
„მე და ლელამ 6 წლიანი ერთად ცხოვრების შემდეგ, გაშორება გადავწყვიტეთ. ეს გადაწყვეტილება დიდი ხანი მწიფდებოდა და ურთიერთშეთახმებით მივიღეთ. ასე რომ, ნურც მე და ნურც მას ნუ დაგვძრახავთ, ჩვენო საერთო მეგობრებო! ჩვენ, ჩვენი ბავშვების გარდა, საერთო შვილი ალექსანდრე გვყავს, რომელზე ზრუნვა გაგვაერთიანებს“, — აღნიშნა უგულავამ.
გიგი უგულავა და ლელა კილაძე ექვსი წლის წინ დაქორწინდნენ, მათი შვილი ალექსანდრე ხუთი წლისაა. სანამ უგულავას მეუღლე გახდებოდა, კილაძე ვიზაჟისტად მუშაობდა.
გიგი უგულავას 9 წლით თავისუფლების აღკვეთა მიესაჯა, თუმცა, ამნისტიის გათვალისწინებით, სასჯელის ვადა გაუნახევრდა და ის საპატიმროში 4 წელსა და 6 თვეს დაჰყოფს.
