საქართველოს პრემიერმა და გუბერნატორებმა რეგიონების საინვესტიციო პოტენციალი განიხილეს

თბილისი, 16 იანვარი — Sputnik. საქართველოს პრემიერ-მინისტრმა გიორგი კვირიკაშვილმა გუბერნატორებთან ერთად რეგიონების საინვესტიციო პოტენციალი და განვითარების პერსპექტივები განიხილა, იუწყება პრემიერის ადმინისტრაციის პრესსამსახური.

მთავრობის მეთაური ასევე მიმდინარე და დაგეგმილ საინვესტიციო პროექტების თემასაც შეეხო. საუბარია რეგიონებში გაზიფიკაციის, სასმელი წყლის სისტემის რეაბილიტაციისა და გზების რემონტის საკითხებზე.

პრემიერის განცხადებით, „ხელისუფლების მიზანს წარმოადგენს ყველა ოჯახის უზრუნველყოფა სასმელი წყლით და ამ მიმართულებით მნიშვნელოვანი ნაბიჯებია გადასადგმელი“. 

საქართველოს მთავრობის ადმინისტრაციის შენობაში პრემიერ-მინისტრთან შეხვედრას გუბერნატორებთან ერთად ესწრებოდნენ ეკონომიკის, ენერგეტიკისა და რეგიონული განვითარებისა და ინფრასტრუქტურის მინისტრები, ასევე ეკონომიკური საბჭოს მდივანი, მთავრობის ადმინისტრაციის უფროსი და მთავრობის ადმინისტრაციის რეგიონებთან და ადგილობრივ თვითმმართველ ორგანოებთან ურთიერთობის დეპარტამენტის ხელმძღვანელი.