თბილისი, 14 იანვარი — Sputnik. ინდონეზიის პრეზიდენტმა ჯოკო ვიდოდომ ქვეყანაში ხუთშაბათს მომხდარ აფეთქებებს ტერაქტი უწოდა, იუწყება რუსული საინფორმაციო სააგენტო „რია ნოვოსტი“ სააგენტო „ფრანს პრესზე“ დაყრდნობით.
„ჩვენს ერსა და ხალხს არ უნდა შეეშინდეს, ტერორიზმის აქტები ვერ დაგვამარცხებს. იმედი მაქვს, რომ საზოგადოება სიმშვიდეს შეინარჩუნებს. ჩვენ ყველა ვწუხვართ ინციდენტის შედეგად დაღუპულების გამო, მაგრამ ასევე ვგმობთ იმას, რამაც ჩვენი უსაფრთხოება და მშვიდობა დაარღვია და ადამიანებში შიში დანერგა“, — ციტირებს სააგენტო ვიდოდოს სიტყვებს.
მანამდე გავრცელდა ინფორმაცია, რომ ხუთშაბათს ინდონეზიის დედაქალაქში აფეთქებების სერია მოხდა, ქალაქში სროლის ხმა ისმოდა. პოლიციის მონაცემებით, ქალაქში ექვსამდე აფეთქება მოხდა. ერთი მათგანი სავაჭრო ცენტრის მოპირდაპირე მხარეს, მეორე — ერთ-ერთ კაფესთან ახლოს მოხდა. ამ რაიონშია განთავსებული ფეშენებელური სასტუმროები, საელჩოები და საოფისე შენობები.
ვრცელდება ინფორმაცია, რომ აფეთქებების შედეგად ექვსი ადამიანი გარდაიცვალა.
