თბილისი, 8 იანვარი — Sputnik. საქართველოს სამხედრო გზაზე, მლეთა–გუდაურის გზაზე რამდენიმე ზვავი ჩამოწვა, განაცხადეს საქართველოს რეგიონული განვითარებისა და ინფრასტრუქტურისსამინისტროს საავტომობილო გზების დეპარტამენტში პარასკევს, 8 იანვარს.
„წინასწარი ინფორმაციით, მლეთა–გუდაურის გზაზე რამდენიმე ზვავია ჩამოსული. სრული ინფორმაცია ჩამოსული ზვავების შესახებ მხოლოდ ზვავსაშიშროების მოხსნის შემდეგ ვიზუალური დათვალიერების საფუძველზე დადგინდება. ზვავების მოცულობაზე იქნება დამოკიდებული შესასრულებელი გაწმენდითი სამუშაოების მასშტაბები და გზის გახსნის დრო“, — აღნიშნულია განცხადებაში.
გარემოს დაცვის ეროვნული სააგენტოს რეკომენდაციით, ქარბუქისა და ზვავსაშიშროების გამო, მცხეთა-სტეფანწმინდა-ლარსის საავტომობილო გზის მლეთა-კობის მონაკვეთზე ყველა სახის ტრანსპორტის მოძრაობა აკრძალულია.
საავტომობილო გზების დეპარტამენტის შესაბამისი სამსახურები ადგილზე არიან მობილიზებული და ზვავსაშიშროების მოხსნისთანავე დაიწყებენ გზის გაწმენდით სამუშაოებს, აღნიშნეს სამინისტროში.
