თბილისი, 6 იანვარი — Sputnik. ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში ფედერიკა მოგერინიმ, ბირთვული გამოცდის შესახებ განცხადების შემდეგ, ჩრდილოეთ კორეის ხელისუფლებას მოუწოდა დაუბრუნდეს საერთაშორისო თანამეგობრობასთან დიალოგს და შეწყვიტოს „უკანონო და საშიში ქმედებები“, აღნიშნულია მის კომუნიკეში.
„თუ ეს დადასტურდება, ეს ქმედება, როგორც გაეროს უშიშროების საბჭოს რამდენიმე რეზოლუციაშია აღნიშნული, ჩრდილოეთ კორეის ბირთვული იარაღის ცდების ჩატარების მხრივ, საერთაშორისო ვალდებულებების სერიოზული დარღვევა იქნება,“, — განაცხადა ევროპის უმაღლესმა კომისარმა.
მისი განცხადებით, ეს ქმედებები საფრთხეს უქმნის მსოფლიოსა და მთელს ჩრდილო-აღმოსავლეთ აზიის რეგიონს.
„მოვუწოდებ ჩრდილოეთ კორეას, დაუბრუნდეს საერთაშორისო თანამეგობრობასთან მნიშვნელოვან დიალოგს, კერძოდ, ექვსმხრივ მოლაპარაკებებს და შეწყვიტოს უკანონო და საშიში მოქმედება“, — განაცხადა მოგერინიმ.
