თბილისი, 4 იანვარი — Sputnik. ქართული მედიის ინფორმაციით, საშტორმო გაფრთხილების გამო ბათუმის პორტი უკვე რამდენიმე დღეა დახურულია.
ზედიზედ მეოთხე დღეა საქართველოს რეგიონებში დიდთოვლობის გამო პრობლემებია, შეზღუდულია ავტოტრანსპორტის მოძრაობა, აჭარის მოსახლეობის დიდ ნაწილს არ მიეწოდება ელექტროენერგია, ზვავსაშიშროების გამო დაკეტილია საქართველოს სამხედრო გზა.
ბათუმის პორტი 30 დეკემბერს დაიხურა საშტორმო გაფრთხილების გამო, რადგან ქარის სიჩქარემ წამში 22 მეტრს გადააჭარბა, ხოლო პორტის ფუნქციონირებისათვის ქარის სიჩქარე 11 მეტრს არ უნდა აჭარბებდეს.
პორტი მას შემდეგ გაიხსნება, რაც საშტორმო გაფრთხილება მოიხსნება. გემების დაცლისა და განრიგის გეგმის შედგენისთანავე ნავსადგური გემებს მიიღებს.
