თბილისი, 4 იანვარი — Sputnik. კონკრეტული შეთანხმება ირანთან სომხეთის გავლით საქართველოსათვის გაზის მოწოდების თაობაზე არ არსებობს, ნათქვამია საქართველოს ენერგეტიკის სამინისტროს განცხადებაში.
ორშაბათს, 4 იანვარს, ირანულმა მედიამ გაავრცელა ინფორმაცია, რომ ირანი იწყებს სომხეთის გავლით საქართველოში გაზის ტრანსპორტირებას ელექტროენერგიის წარმოების მიზნით, ყოველდღიურად 8-15 მილიონი კუბამეტრის ოდენობით.
„ირანულ მხარესთან ამ ეტაპზე კონკრეტული შეთანხმება არ არსებობს და შესაბამისად ბუნებრივი აირის მოწოდების დაწყების საკითხიც არ არის გადაწყვეტილი.
აქვე უნდა აღვნიშნოთ, რომ ირანი ერთ-ერთი მსხვილი გაზის მწარმოებელი ქვეყანაა მსოფლიოში და ბუნებრივია გაგრძელდება მოლაპარაკებები ყველა პოტენციურ მომწოდებელთან რეგიონში გრძელვადიან პერსპექტივაში საქართველოს სტაბილური და უწყვეტი გაზმომარაგების უზრუნველყოფის მიზნით“, — ნათქვამია სამინისტროს მიერ გავრცელებულ ინფორმაციაში.
