თბილისი, 4 იანვარი — Sputnik. სრულიად საქართველოს კათოლიკოს-პატრიარქს ილია მეორეს ორშაბათს, 4 იანვარს 83 წელი შეუსრულდა.
წელს პატრიარქის დაბადების დღესთან დაკავშირებული ტრადიციული მიღება დაგეგმილი არ არის. თბილისის საკონცერტო დარბაზში 20:00 საათზე ქართველი შემსრულებლის ჯემალ სეფიაშვილის საქართველოს სულიერი ლიდერისადმი მიძღვნილი კონცერტი გაიმართება.
ილია მეორე (ირაკლი ღუდუშაური-შიოლაშვილი) გიორგი შიოლაშვილისა და ნატალია კობაიძის ოჯახში მეოთხე შვილი იყო. 1927 წელს ოჯახი საცხოვრებლად ვლადიკავკაზში გადავიდა. ჩვილი ქართულ ტაძარში შობის დღესასწაულზე მოინათლა.
1952 წელს ილია მეორემ ვლადიკავკაზის №22 საშუალო სკოლა დაამთავრა, 1957 წელს — მოსკოვის სასულიერო სემინარია და 1960 წელს — მოსკოვის სასულიერო აკადემია. 1957 წლის 16 აპრილს, სასულიერო სემინარიის მეორე კურსზე ყოფნისას, 24 წლის ირაკლი შიოლაშვილი მელქისედეკ მესამის კურთხევით ბერად აღიკვეცა.
ილია მეორე ბათუმისა და შემოქმედის ეპისკოპოსად 1963 წლის 26 აგვისტოს ეკურთხა. იყო მცხეთის სასულიერო სემინარიის რექტორი (1963-1972 წლებში). 1967 წელს სოხუმის ეპისკოპოსი გახდა, 1969 წლიდან — მიტროპოლიტი.
1977 წლის 9 ნოემბერს, კათოლიკოს-პატრიარქ დავით V-ის გარდაცვალების შემდეგ, ილია მეორე წმინდა სინოდის გადაწყვეტილებით, პატრიარქის ადგილმონაცვლედ დაინიშნა. 1977 წელს კათოლიკოს-პატრიარქად აირჩიეს. ილია მეორის ინტრონიზაცია 1977 წლის 25 დეკემბერს გაიმართა.
საქართველოს პატრიარქად ილია მეორის ყოფნის პერიოდში, 1980-იან წლებიდან საქართველოში მართლმადიდებლობის აღორძინება დაიწყო. ბოლო 36 წლის განმავლობაში საქართველოში ეპარქიების რაოდენობა 15-დან 33-მდე გაიზარდა. 1977 წელს საქართველოში მხოლოდ 48 მოქმედი ტაძარი იყო, ახლა კი დაახლოებით 1000-ია.
წმინდანად შერაცხეს სხვადასხვა სასულიერო მოღვაწე, გაიხსნა ახალი სასულიერო სასწავლებლები, მათ შორის თბილისისა და გელათის სასულიერო აკადემიები. თბილისში საქართველოს მასშტაბით ყველაზე დიდი — წმინდა სამების საპატრიარქო ტაძარი აშენდა.