თბილისი, 31 დეკემბერი — Sputnik. მულტინაციონალური კომპიუტერული ტექნოლოგიების კორპორაცია „მაიკროსოფტი“ პროგრამა „აუთლუქით“ მოსარგებლე მომხმარებელს სახელისუფლებო ორგანოების მხრივ მათი ანგარიშების გატეხვის მცდელობის თაობაზე გააფრთხილებს, — იუწყება რუსული საინფორმაციო სააგენტო „რია ნოვოსტი“ სააგენტო „როიტერზე“ დაყრდნობით.
კომპანიას არ დაუზუსტებია, რომელი ქვეყნის მთავრობებზეა საუბარი, ითქვა მხოლოდ ის, რომ საქმე რამდენიმე სხვადასხვა ქვეყანას ეხება. ამასთან, „მაიკროსოფტის“ ყოფილი თანამშრომლების განცხადებით, მათთვის ცნობილი იყო, რომ ჩინეთის ხელისუფლება ცდილობდა „აუთლუქის“ მომხმარებელთა ფოსტის გატეხვას.
ამერიკის ხელისუფლება ანალოგიური სკანდალის ცენტრში ორი წლის წინ აღმოჩნდა, როდესაც ედვარდ სნოუდენმა აშშ სპეცსამსახურების მხრივ მასშტაბური თვალთვალის შესახებ აცნობა მსოფლიოს.
