თბილისი, 15 დეკემბერი — Sputnik. ევროკავშირთან ვიზალიბერალიზაციის სამოქმედო გეგმის შესრულების თაობაზე ევროკომისიის დასკვნის გამოქვეყნება ტექნიკური მიზეზებით გადაიდო, რაც ქართულ მხარეს არ უკავშირდება, — განუცხადა ჟურნალისტებს პრემიერ–მინისტრმა ირაკლი ღარიბაშვილმა დღეს, 15 დეკემბერს.
მანამდე ცნობილი იყო, რომ ვიზალიბერალიზაციის თაობაზე ევროკომისიის დასკვნა 15 დეკემბერს უნდა გამოქვეყნებულიყო. როგორც უმაღლესმა ევროკომისარმა ფედერიკა მოგერინიმ განმარტა, კომისია მხარეებთან მუშაობას განაგრძობს და მოხსენება უახლოეს დღეებში გამოქვეყნდება.
„გუშინ ევროკავშირში სატელეფონო საუბრები მქონდა და გეტყვით, რომ ვიზალიბერალიზაციასთან დაკავშირებით ჩვენთან მიმართებაში არავითარი პრობლემა არ არსებობს. საუბარია რაღაც ტექნიკურ დეტალებზე, რაც ჩვენს ქვეყანას არ ეხება. ასე რომ, გთხოვთ, დაველოდოთ ევროკომისიის საბოლოო ანგარიშს, რომლის გამოქვეყნება უახლოეს დღეებში მოხდება“, — განუცხადა საქართველოს პრემიერ-მინისტრმა ირაკლი ღარიბაშვილმა ჟურნალისტებს.
ევროკომისიის წინა დასკვნის თანახმად, საქართველოს ვიზალიბერალიზაციის სამოქმედო გეგმის მეორე ფაზის 15 ძირითადი მოთხოვნიდან შვიდი ჰქონდა შესრულებული. ეს ეტაპი თავშესაფრის, მიგრაციისა და საზღვრის მართვის საკითხებს მოიცავს.
