თბილისი, 11 დეკემბერი – Sputnik. აშშ-ში ოფიციალური ვიზიტით მყოფმა საქართველოს შს მინისტრმა გიორგი მღებრიშვილმა აშშ–ის თავდაცვის დეპარტამენტის თავდაცვის საფრთხეების შემცირების სააგენტოს (DTRA) დირექტორთან, კენეტ მეიერსთან გამართა შეხვედრა, იუწყება შსს–ს პრესსამსახური.
შეხვედრაზე მხარეებმა საქართველოს შსს-სა და აშშ-ის სახელმწიფო დეპარტამენტს შორის არსებული თანამშრომლობის სფეროები, მიღწეული პროგრესი და სამომავლო გეგმები განიხილეს.
მინისტრის განცხადებით, საქართველო რეგიონში ერთ-ერთი წარმატებული ქვეყანაა ქიმიურ, ბირთვულ, რადიაციულ და ბიოლოგიურ საფრთხეებთან ბრძოლის მიმართულებით.
„ჩვენ ყოველთვის ვამაყობთ საქართველოს მთავრობის წარმატებითა და თქვენთან ურთიერთობით. თქვენი ქვეყანა არის სანიმუშო მაგალითი რეგიონში უსაფრთხოების დაცვისა და განვითარების კუთხით“, — აღნიშნა კენეტ მეიერსმა.
შეხვედრაზე მხარეები სამომავლოდ ერთობლივი პროექტების განხორციელებასა და ურთიერთანამშრომლობის გაღრმავებაზე შეთანხმდნენ.
შეხვედრის დასასრულს შს მინისტრმა კენეტ მეიერსი 2016 წელს საქართველოში, „ქიმიური, ბიოლგიური, რადიაციული და ბირთვული (ქბრბ) მეცნიერებისა და შედეგების მართვის მსოფლიო კონგრესზე“ ოფიციალურად მიიწვია, აღნიშნავს შს სამინისტრო.
აშშ-ში საქართველოს შს მინისტრის ვიზიტი 11 დეკემბერს დასრულდება.
