თბილისი, 7 დეკემბერი – Sputnik. საქართველოს საგარეო საქმეთა მინისტრი გიორგი კვირიკაშვილი ღრმა მწუხარებას გამოთქვამს 2015 წლის 4 დეკემბერს აზერბაიჯანის „გიუნეშლის“ საბადოს საზღვაო პლატფორმაზე მომხდარი ხანძრის გამო, იუწყება საგარეო საქმეთა სამინისტროს პრესსამსახური ორშაბათს, 7 დეკემბერს
გავრცელებული ინფორმაციით, აზერბაიჯანში, „გიუნეშლის“ ნავთობსაბადოს მე-10 პლატფორმაზე ხანძარი გაზსადენის დაზიანების გამო გაჩნდა. ბოლო მონაცემებით, 29 ადამიანი უგზო–უკვლოდ არის დაკარგული, 1 ადამიანი დაიღუპა, ხოლო 32 ადამიანის გადარჩენა შეძლეს.
„საქართველოს ვიცე-პრემიერი, საგარეო საქმეთა მინისტრი გიორგი კვირიკაშვილი ღრმა მწუხარებას გამოთქვამს 2015 წლის 4 დეკემბერს აზერბაიჯანის „გიუნეშლის“ საბადოს საზღვაო პლატფორმაზე მომხდარი ხანძრის გამო, რომლის შედეგად დაიღუპა და დაშავდა არაერთი ადამიანი. საქართველოს ვიცე-პრემიერი სამძიმარს უცხადებს დაღუპულთა ოჯახებს, აზერბაიჯანის ხელისუფლებას, მოსახლეობას და უთანაგრძნობს მათ ამ მძიმე წუთებში“, – აღნიშნულია განცხადებაში.
ტრაგედიასთან დაკავშირებით სამძიმარი ასევე გამოთქვეს საქართველოს პრემიერ–მინისტრმა ირაკლი ღარიბაშვილმა და პრეზიდენტმა გიორგი მარგველაშვილმა.
