თბილისი, 2 დეკემბერი — Sputnik. ბაქო-თბილისი-ყარსის სარკინიგზო პროექტი საქართველოს მონაკვეთზე, პრაქტიკულად, დასრულებულია — ამის შესახებ საქართველოს ეკონომიკისა და მდგრადი განვითარების მინისტრმა დიმიტრი ქუმსიშვილმა ჟურნალისტებს ოთხშაბათს, 2 დეკემბერს განუცხადა.
„ბაქო-თბილისი-ყარსის პროექტი ახალი სატრანსპორტო დერეფნის ნაწილია, რომელიც გააერთიანებს აზერბაიჯანის, საქართველოსა და თურქეთის სარკინიგზო ხაზებს. ამ პროექტის განხორციელების შედეგად, თურქეთის გავლით გაიხსნება სარკინიგზო დერეფანი აზიიდან ევროპისკენ“, — აღნიშნა ქუმსიშვილმა.
„იმედი გვაქვს, რომ თურქეთში სამუშაოები დაჩქარდება და ჩვენ საკმაოდ სწრაფად მივიღებთ დასრულებულ პროდუქტს“, — დასძინა მინისტრმა.
რკინიგზის ექსპლუატაციაში შესვლა 2015 წელს იგეგმებოდა. „ბაქო-თბილისი-ყარსის“ რკინიგზის მაგისტრალის მშენებლობის ფარგლებში, 2015 წლის იანვარში ქართულ მონაკვეთზე პირველი სატესტო მატარებელი გავიდა.
„ბაქო-თბილისი-ყარსის“ სარკინიგზო მაგისტრალის მშენებლობის პროექტი საერთაშორისო შეთანხმების ფარგლებში ხორციელდება, რომელიც საქართველოს, თურქეთსა და აზერბაიჯანს შორის არის გაფორმებული.
ახალი სარკინიგზო მაგისტრალის გამტარუნარიანობა პირველ ეტაპზე 1 მილიონი მგზავრი და 5 მილიონი ტონა ტვირთია. ტვირთების მოცულობა მუდმივად გაიზრდება და მეორე ეტაპისათვის იგეგმება 15 მილიონი ტონა ტვირთის გადაზიდვა წელიწადში. საქართველოს ეკონომიკის სამინისტროში აღნიშნეს, რომ სარკინიგზო მაგისტრალის ამოქმედების შემდეგ, 2500 ადამიანი დასაქმდება.
