აჭარის ტურიზმის დეპარტამენტმა ვარშავის გამოფენაში მიიღო მონაწილეობა

თბილისი, 1 დეკემბერი — Sputnik. აჭარის ტურიზმისა და კურორტების დეპარტამენტმა მონაწილეობა მიიღო პოლონეთის 23-ე საერთაშორისო ტურისტულ სალონში — "TT Warsaw 2015". 

ვარშავის კონგრეს ჰოლში გამართული გამოფენა პოლონეთის მასშტაბით ერთ-ერთი ყველაზე დიდი ტურისტული სალონია და მასში ტურიზმის სექტორისა და ტურისტული ბიზნესის 18 000-მდე პროფესიონალი წარმომადგენელი ღებულობს მონაწილეობას. წელს, აჭარის ტურიზმის დეპარტამენტი საქართველოს ტურიზმის ეროვნულ ადმინისტრაციასთან ერთად საერთო საგამოფენო სტენდში  აჭარას ნუწევდა პოპულარიზაციას.. გამოფენაში ასევე ბათუმის დელფინარიუმიც მონაწილეობს.

 ბოლო წლებში პოლონეთი აჭარისა და მთლიანად საქართველოს მნიშვნელოვანი ტურისტული ბაზარი გახდა, სადაც აჭარა მუდმივად ახორციელებს სარეკლამო და მარკეტინგულ აქტივობებს, როგორც პოლონულ ტურისტულ გამოფენებში მონაწილეობით, ასევე სხვადასხვა სარეკლამო საშუალებებით.

 აღსანიშნავია, რომ აჭარაში პოლონეთი, ტურისტთა ზრდის მაჩვენებლით, გამორჩეული ქვეყნების ხუთეულში შედის. 2015 წლის 10 თვის განმავლობაში აჭარის რეგიონში 13890 პოლონელი მოგზაური შემოვიდა, რაც წინა წლის ანალოგიურ პერიოდთან შედარებით 3,1%-ით მეტია.