თბილისი, 24 ნოემბერი — Sputnik. ტურისტთა რაოდენობა, რომლებიც აჭარას 2015 წლის იანვარ–ოქტომბრის პერიოდში ეწვივნენ, გასული წლის ანალოგიურ პერიოდთან შედარებით, 2,78%–ით გაიზარდა, — იუწყება აჭარის ტურიზმისა და კურორტების დეპარტამენტი.
დადებითი ზრდის ტენდენცია განსაკუთრებით მაღალია უცხოელ ვიზიტორთა შორის, რომლებიც რეგიონს ბათუმის საერთაშორისო აეროპორტის გავლით ესტუმრნენ.
ბათუმის საერთაშორისო აეროპორტში ჩამოსული უცხოელი ტურისტების რაოდენობა 2015 წლის ოქტომბერში, გასული წლის ანალოგიურ პერიოდთან შედარებით, 46%–ით გაიზარდა და 5 509 ადამიანი შეადგინა.
ტურისტების რაოდენობით ლიდერობენ ისრაელი, უკრაინა, თურქეთი, რუსეთი და ბელარუსი.
ბათუმის საერთაშორისო აეროპორტში ჩამოსული უცხოელი ტურისტების რაოდენობა 2015 წლის იანვარ–ოქტომბრის პერიოდში, გასული წლის ანალოგიურ პერიოდთან შედარებით, 14%–ით გაიზარდა და 70 176 ადამიანი შეადგინა.
