შოიგუმ სირიაში ჩამოგდებული სუ–24–ის შტურმანის სამაშველო ოპერაციის შესახებ ისაუბრა

რუსეთის თავდაცვის მინისტრმა სერგეი შოიგუმ რუსული უწყების კოლეგიის სხდომაზე სამშაბათს  თურქული გამანადგურებელი ფ–16–ით ჩამოგდებული ბომბარდირი სუ–24–ის შტურმანის სამაშველო ოპერაციის შესახებ ისაუბრა. 

 თურქეთის სამხედრო–საჰაერო ძალების მიერ სირიაში ბომბარდირი სუ–24–ის ჩამოგდების შედეგად დაიღუპნენ თვითმფრინავის კაპიტანი და სამაშველო ოპერაციაში მონაწილე საზღვაო ქვეითი. თვითმფრინავის მეორე პილოტი გადარჩა და რუსეთის ბაზაზეა გადაყვანილი. ამის შესახებ ოთხშაბათს ისაუბრა რუსეთის თავდაცვის მინისტრმა სერგეი შოიგუმ რუსული უწყების კოლოგიის სხდომაზე.

შოიგუს თქით, შტურმანის სამაშველო ოპერაცია 12 საათს გაგრძელდა. მასში რუსული და სირიული სპეცრაზმები მონაწილეობდა.

"ოპერაციის დასრულების შესახებ მე ჩავაბარე ანგარიში რუსეთის სამხედრო ძალების უზენაეს მთავარსარდალს, მან ამ ოპერაციაში მონაწილე შემადგენლობისათვის მადლობის გადახდა მთხოვა", – განაცხადა შოიგუმ.

რუსეთის პრეზიდენტმა ვლადიმერ პუტინმა ოთხშაბათს განაცხადა, რომ სირიაში დაღუპულ სამხედრო მოსამსახურეებს, ასევე გადარჩენილ შტურმანსა და სამაშველო ოპერაციის მონაწილეებს სახელმწიფო ჯილდო გადაეცემათ.

სამშაბათს, 24 ნოემბერს, რუსული თვითმფრინავი სუ–24 ჩამოვარდა სირიაში. ბომბარდირი თურქულმა გამანადგურებელმა ფ–16–მა "воздух-воздух" ტიპის რაკეტით ჩამოაგდო და ის სირიაში, თურქეთის საზღვრიდან 4 კილომეტრის დაშორებით ჩამოვარდა.