თბილისი, 25 ნოემბერი — Sputnik. აშშ მიიჩნევს, რომ რუსული სუ-24 სირიის საჰაერო სივრცეში მას შემდეგჩამოაგდეს, რაც ის მცირე ხნით თურქეთის საჰაერო სივრცეში შევიდა, — იუწყება რუსული საინფორმაციო სააგენტო „რია ნოვოსტი“ სააგენტო „როიტერზე“ დაყრდნობით.
როგორც სააგენტოს ამერიკელმა ანონიმმა ჩინოსანმა განუცხადა, ეს მოსაზრება „თვითმფრინავის აღმოჩენილ სითბურ კვალს“ ეფუძნება.
რუსული თვითმფრინავი სუ-24 სირიაში სამშაბათს ჩამოვარდა. რუსეთის პრეზიდენტმა ვლადიმირ პუტინმა განაცხადა, რომ თვითმფრინავი სირიის ტერიტორიაზე თურქეთის საზღვრიდან 4 კილომეტრში ჩამოვარდა. თვითმფრინავი ჰაერში, თურქეთის ტერიტორიიდან 1 კილომეტრში, ექვსიათას მეტრ სიმაღლეზე იყო, როდესაც მასზე იერიში მიიტანეს. რუსეთის პრეზიდენტმა ამას ტერორისტების ხელშემწყობთა მხრიდან „ზურგში დარტყმა“ უწოდა. რუსეთის შეიარაღებული ძალების გენერალურმა შტაბმა განაცხადა, რომ სუ-24-ს თურქეთის საზღვრები არ გადაუკვეთია და ამას სირიის ჰაერსაწინააღმდეგო თავდაცვის მონაცემები ადასტურებს. თურქეთი ირწმუნება, რომ რუსული თვითმფრინავი ქვეყნის საჰაერო სივრცეში შევიდა.
მანამდე პენტაგონის წარმომადგენელმა პიტერ კუკმა განაცხადა, რომ კოალიციამ, რომელიც ერაყსა და სირიაში აშშ-ის ხელმძღვანელობით მოქმედებს, დააფიქსირა, როგორ აფრთხილებდნენ თურქი პილოტები მოგვიანებით ჩამოგდებული სუ-24-ის ეკიპაჟს.
„რაც შეეხება თურქების მხრიდან გაფრთხილებას, ჩვენ ამის შესახებ ვიცოდით. კოალიციის ოპერატიულმა ცენტრმა გაფრთხლება მოისმინა“, — განაცხადა კუკმა.
პენტაგონის წარმომადგენელმა ასევე განაცხადა, რომ მან არაფერი იცის რუსული თვითმფრინავის განგაშის სიგნალის შესახებ.
