თბილისი, 4 ნოემბერი — Sputnik. მიუხედავად თბილისის საქალაქო სასამართლოს მიერ 3 ნოემბერს გამოტანილი განაჩენისა, ბიზნესმენი ქიბარ ხალვაში ტელეკომპანია „რუსთავი 2“-ს ვერ დაიბრუნებს, განაცხადა ტელეკომპანიის გენერალურმა დირექტორმა ნიკა გვარამიამ.
საქართველოს საკონსტიტუციო სასამართლომ 2 ნოემბერს დააკმაყოფილა „რუსთავი 2“-ის შუამდგომლობა და საკითხის საბოლოო გადაწყვეტამდე შეაჩერა საქართველოს სამოქალაქო საპროცესო კოდექსის 268-ე მუხლის „ზ“ ქვეპუნქტის მოქმედება, რომელიც განსაზღვრავს პირველი ინსტანციის სასამართლოს მიერ მიღებული გადაწყვეტილების დაუყოვნებლივ აღსრულების ერთ-ერთ საფუძველს.
„აღნიშნული გადაწყვეტილება (საქალაქო სასამართლოს — რედ.) საკონსტიტუციო სასამართლოს გადაწყვეტილებიდან გამომდინარე, ტელეკომპანიისთვის არაფერს ცვლის…ურთმელიძის მიერ გამოტანილ გადაწყვეტილებას არც სამართლებრივი და არც პრაქტიკული ღირებულება არ გააჩნია. ამ გადაწყვეტილებით ხალვაში ტელეკომპანიაში შემოსვლას ვერ შეძლებს“, — აღნიშნა გვარამიამ.
ამასთან, გვარამიამ მოსამართლე ურთმელიძე „რუსთავი 2“-სთვის სამართლიანი მართლმსაჯულების უფლების ჩამორთმევაში დაადანაშაულა.
„დღეს საქალაქო პალატა (საქალაქო სასამართლო) ბოლომდე დეგრადირებული და კორუმპირებულია და ამის გაკეთება ერთმა მოსამართლემ შეძლო“, — განმარტა ტელეკომპანიის გენერალურმა დირექტორმა.
თბილისის საქალაქო სასამართლომ თამაზ ურთმელიძის თავმჯდომარეობით, სამშაბათს, 3 ნოემბერს 2005 წლის დეკემბერსა და 2006 წლის ნოემბერში ქიბარ ხალვაშის მიერ ტელეკომპანია „რუსთავი 2“-ის გასხვისების ხელშეკრულებების ანულირება მოახდინა.
სასამართლოს გადაწყვეტილებით, ტელეკომპანია „რუსთავი 2“-ის 60% ქიბარ ხალვაშს გადაეცემა, ხოლო დანარჩენი 40% — მის კომპანიას შპს „პანორამას“.
საქართველოს საკონსტიტუციო სასამართლოს მიერ 2 ნოემბერს მიღებული გადაწყვეტილებიდან გამომდინარე, აღნიშნული გადაწყვეტილება დაუყოვნებლივ ვერ აღსრულდებადა „რუსთავი 2"-ის იურისტებს საშუალება ექნებათ გაასაჩივრონ პირველი ინსტანციის სასამართლოში.
