თბილისი, 16 ოქტომბერი — Sputnik. თურქეთის სამხედრო-საჰაერო ძალების თვითმფრინავებმა ამოუცნობი ნიშნების მქონე თვითმფრინავი ჩამოაგდეს, რომელმაც სირიის მხრიდან დაარღვია ქვეყნის საჰაერო სივრცე, — ნათქვამია თურქეთის შეიარაღებული ძალების გენერალური შტაბის მიერ პარასკევს გავრცელებულ განცხადებაში.
„დღეს თურქეთის საჰაერო სივრცეში, თურქეთ-სირიის საზღვარზე აღმოვაჩინეთ ამოუცნობი სახელმწიფო კუთვნილების თვითმფრინავი. სამგზის გაფრთხილების შემდეგ ის მაინც განაგრძობდა თურქეთის საჰაერო სივრცეში ფრენას. ამის შემდეგ ჩვენმა თვითმფრინავებმა, რომლებიც საზღვარზე პატრულირებდნენ, საფრთხეებზე რეაგირების წესების ფარგლებში, ცეცხლი გაუხსნეს და ჩამოაგდეს აღნიშნული თვითმფრინავი“, — ნათქვამია დოკუმენტში.
გენერალური შტაბი ხაზგასმით აღნიშნავს, რომ ქვეყნის საჰაერო სივრცის დარღვევა კვლავაც გადაჭრით აღიკვეთება.
მოგვიანებით თურქულმა ტელეარხმა NTV სამხედრო წყაროზე დაყრდნობით განაცხადა, რომ ჩამოგდებულია უპილოტო საფრენი აპარატი.
