თბილისი, 14 ოქტომბერი — Sputnik. 458,6 ათასზე მეტ ფიზიკურ პირს დაუბრუნდა დაუბეგრავი მინიმუმი 125,8 მილიონი ლარის ოდენობით, იტყობინება ფინანსთა სამინისტროს შემოსავლების სამსახური.
ამ თანხების დაბრუნების პროცესი მიმდინარე წლის 1 აპრილიდან დაიწყო. საქართველოს იმ მოქალაქეებს, რომელთა დარიცხული შემოსავალი 2014 წელს 6 ათას ლარს არ აღემატებოდა, 360 ლარამდე თანხა დაუბრუნდათ დაუბეგრავი მინიმუმის სახით.
1 აპრილიდან ფინანსთა სამინისტროს შემოსავლების სამსახურის ვებ-გვერდზე გააქტიურდა დეკლარაციის სპეციალური ფორმა, რომლის შევსებითაც იწყებოდა დაუბეგრავი მინიმუმის დაბრუნების პროცედურა. მოქალაქეებს შეეძლოთ შეევსოთ სპეციალური დეკლარაციები 30 სექტემბრის ჩათვლით, იტყობინება საქართველოს საგადასახადო უწყება.
კერძოდ, ფიზიკურ პირს, რომლის ხელფასი ან მიღებული შემოსავალი წლის განმავლობაში 1,8-6 ათას ლარს შეადგენს, სახელმწიფო 360 ლარს უბრუნებს, ხოლო თუ მოქალაქემ 1,8 ათას ლარზე ნაკლები მიიღო შემოსავლის სახით, მას წლის განმავლობაში მიღებული თანხის 20% უბრუნდება.
2014 წელს 470 ათასზე მეტმა ადამიანმა ჯამში 130 მილიონი ლარი მიიღო.
