თბილისი, 2 ოქტომბერი — Sputnik. საგადასახდელო ბალანსის მიმდინარე ანგარიშის დეფიციტმა საქართველოში 2015 წლის მეორე კვარტალში 354,7 მლნ აშშ დოლარი შეადგინა, რაც 22%-ით ნაკლებია 2015 წლის პირველ კვარტალთან და 16,2%–ით – 2014 წლის მეორე კვარტალთან შედარებით, ნათქვამია საქართველოს ეროვნული ბანკის მასალებში.
მიმდინარე ანგარიშის ყველაზე მეტად დეფიციტური კომპონენტი იმ საქონლით ვაჭრობაა, რომელთა უარყოფითმა სალდომ მეორე კვარტალში 991,0 მლნ ლარი შეადგინა, რაც 7%-ით ნაკლებია 2014 წლის ანალოგიურ პერიოდთან შედარებით და 2,1%-ით ნაკლებია 2015 წლის პირველი კვარტლის მაჩვენებელზე.
საანგარიშო პერიოდში მომსახურების ბალანსი დადებითია და 324,9 მლნ აშშ დოლარს შეადგენს. ამასთან, შემოსავლები ტურისტული მომსახურების სფეროდან წლიური გაანგარიშებით, 7,1%–ით გაიზარდა და 460,1 მლნ აშშ დოლარი შეადგინა.
შემოსავლების ბალანსი უარყოფითია და 122,5 მლნ აშშ დოლარს შეადგენს. მეორე კვარტალში ტრანსფერების დადებითმა სალდომ 423,6 მლნ აშშ დოლარი შეადგინა, რაც 15,4%-ით ნაკლებია 2014 წლის ანალოგიურ პერიოდთან შედარებით და 24%-ით მეტია 2015 წლის პირველ კვარტალთან შედარებით. ზრდა, ძირითადად, С ჰეპატიტის ელიმინაციის პროგრამის ფარგლებში სახელმწიფოსთვის 143,2 მლნ აშშ დოლარის გადარიცხვამ გამოიწვია.
კაპიტალის ანგარიშის ბალანსმა 2015 წლის მეორე კვარტალში 15,6 მლნ აშშ დოლარი შეადგინა. პირდაპირმა ინვესტიციებმა საანგარიშო პერიოდში 314,3 მლნ აშშ დოლარი შეადგინა, რაც 66,8%-ით მეტია 2015 წლის პირველ კვარტალთან შედარებით და 21,2%-ით მეტია 2014 წლის მეორე კვარტალთან შედარებით. პორტფელურმა ინვესტიციებმა 9,1 მლნ აშშ დოლარი შეადგინა.