თბილისი, 29 სექტემბერი — Sputnik. 29 სექტემბრის მონაცემებით, კახეთის რეგიონში გადამუშავებულია 84 ათასი ტონა ყურძენი. ღვინის კომპანიებს ყურძენი 11 ათასამდე მევენახემ ჩააბარა, განაცხადა საქართვდელოს სოფლის მეურნეობის მინისტრმა ოთარ დანელიამ სამშაბათს, 29 სექტემბერს გამართულ ბრიფინგზე.
„გადამუშავებულია რქაწითელი — 39,5 ათასი ტონა, საფერავი — 33,5 ათას ტონა, 2 ათას ტონამდე კახური მწვანე და 9 ათას ტონამდე სხვა ჯიშის ყურძენი“, — განაცხადა დანელიამ.
ამ ეტაპზე გადამუშავების პროცესში ჩართულია 85 კომპანია, მათ შორის, სახელმწიფოს მიერ დაქირავებული 18 ღვინის საწარმო.
ყველაზე დიდი რაოდენობით ყურძენი გადამუშავდა გურჯაანის მუნიციპალიტეტში — 29 ათას ტონამდე. დანარჩენი მუნიციპალიტეტების მონაცემებია: თელავი — 17,5 ათასი ტონა, ყვარელი — 15,5 ათასი ტონა, სიღნაღი — 7,3 ათას ტონა, ლაგოდეხი- 6,7 ათასი ტონა, საგარეჯო — 3,5 ათასი ტონა, ახმეტა — 2,2 ათასი ტონა და დედოფლისწყარო — 2,1 ათასი ტონა, — განაცხადა მინისტრმა.
2015 წლის რთველის მოსავლის საპროგნოზო მონაცემები 30%-ით აღემატება გასული წლის ანალოგიურ მონაცემებს. რთველი 2014-ის ფარგლებში, საქართველოში 124 ათას 606 ტონა ყურძენი მოიკრიფა.
