საქართველოს არასამთავრობო ორგანიზაციის „უმუშევართა კავშირი დასაქმებისთვის“ წარმომადგენლებმა და მისი ხელმძღვანელი თამარ იოვაშვილმა ივნისის დასაწყისში ბრიუსელში უსახლკაროთა პრობლემების თაობაზე ეროვნული ორგანიზაციების ევროპული ფედერაციის წარმომადგენლებთან შეხვედრები გამართა.
რუსული საინფორმაციო სააგენტო „რია ნოვოსტის“ საერთაშორისო პრეს–ცენტრში გამართულ პრესკონფერენციაზე მან განაცხადა, რომ უსახლკაროთა პრობლემების თაობაზე ეროვნული ორგანიზაციების ევროპულ ფედერაციასა და მსგავს საკითხებზე მომუშავე სხვა ევროპულ ორგანიზაციებთან თანამშრომლობის დამყარება იმ კანონის ფონზე გახდა აუცილებელი, რომელიც საქართველოში უსახლკაროთა პრობლემებს დაარეგულირებს და განსაზღვრავს მათ სტატუსს.
„მე ბრიუსელში ვიყავი და იქ შეხვედრები გავმართე. მინდა ვთქვა, რომ ეს შეხვედრები ძალზე ნაყოფიერი იყო. ასე რომ, ჩვენ, უპირველეს ყოვლისა, მივიღეთ თანხმობა დახმარებაზე. ანუ დაინიშნება ყოველთვიური სკაიპ–კონფერენციები, რომლებზეც უსახლკაროთა პრობლემების შესახებ კანონპროექტზე მუშაობის კონკრეტულ საკითხებს განვიხილავთ. ჩვენ ასევე მივიღეთ უფლება, გავხდეთ FEANTSA–ს სრულუფლებიანი წევრი“, – განაცხადა იოვაშვილმა.
