ისრაელი ქვეყანაში შესვლაზე გამონაკლისებს აწესებს: გამოქვეყნდა პირობები

თბილისი, 8 მარტი — Sputnik. უცხოეთის მოქალაქეები ისრალეში შესვლას 8 მარტიდან გამონაკლის შემთხვევებში შეძლებენ – გარკვეული წესების დაცვის შემთხვევაში, იუწყება ისრაელის მთავრობის პრეს-სამსახური.

„ისრაელში თვითმფრინავით შემოსვლის მსურველებმა დეკლარაციის ფორმა რეისის გამოფრენამდე 24 საათით ადრე უნდა შეავსონ“, — ნათქვამია პრეს-სამსახურის განცხადებაში.

ამის შემდეგ მათ უნდა მიიღონ ქვეყანაში შესვლის უფლება, რაც მხოლოდ გამონაკლის შემთხვევაში გაიცემა.

თვითმფრინავში ჩაჯდომის აუცილებელ პირობად რჩება კორონავირუსზე უარყოფითი ტესტის წარდგენა, რომელიც გაფრენამდე 72 საათის განმავლობაში უნდა იყოს გაკეთებული.

ისრაელში ჩაფრენის შემდეგ როგორც უცხოელები, ისე ქვეყნის მოქალაქეები ვალდებული არიან გაიარონ ორკვირიანი იზოლაცია. თუმცა იმ შემთხვევაში, თუ მგზავრს ისრაელში გაკეთებული ვაქცინაციის შესახებ ცნობა ექნება, შეუძლია თავიდან აირიდოს იზოლაცია.