თბილისი, 24 ივლისი — Sputnik. ჩინეთმა აშშ-ს მოსთხოვა, 72 საათში დახუროს გენერალური საკონსულო სიჩუანის პროვინციის ქალაქ ჩენდუში ვაშინგტონის ანალოგიური ქმედების პასუხად, აცხადებს გამოცემა Global Times-ის მთავარი რედაქტორი ჰი სიცზინი.
მანამდე, ოთხშაბათს შეერთებულმა შტატებმა დახურა ჩინეთის გენერალური საკონსულო ჰიუსტონში და ეს ნაბიჯი ამერიკელების ინტელექტუალური საკუთრებისა და პირადი ინფორმაციის დაცვის აუცილებლობით ახსნა. პეკინში ამას პოლიტიკური პროვოკაცია უწოდეს და „გადამჭრელი საპასუხო ნაბიჯების“ პირობა დადეს.
დღეს ჩინეთის საგარეო საქმეთა სამინისტრომ აუწყა ამერიკის საელჩოს, რომ ჩინეთმა გადაწყვიტა „გაიწვიოს ჩენდუში აშშ-ის გენერალური საკონსულოს საქმიანობის ლიცენზია“ და საკონსულოს ნებისმიერი საქმიანობისა და ღონისძიების შეწყვეტა მოსთხოვა.
ბირთვული ომის საფრთხე იზრდება: ჩინეთი აშშ-ს ადანაშაულებს>>
ქვეყნის საგარეო უწყებაში ხაზს უსვამენ, რომ მათი მოთხოვნა არის კანონიერი და საერთაშორისო სამართლის ნორმებისა და დიპლომატიური პრაქტიკის შესაბამისი პასუხი, ხოლო მომხდარზე პასუხისმგებლობა მთლიანად ვაშინგტონს ეკისრება.
„ჩვენ კვლავ მოვუწოდებთ აშშ-ს, გააუქმოს შესაბამისი მცდარი გადაწყვეტილება და შექმნას ყველა აუცილებელი პირობა ორმხრივი სახელმწიფოთაშორისი ურთიერთობების ნორმალიზაციისთვის“, — აცხადებენ სამინისტროში.
აშშ-სა და ჩინეთს შორის ურთიერთობა ამ დროისათვის კვლავ დაძაბული რჩება. მხარეებს ერთმანეთის მიმართ ეკონომიკური პრეტენზიები აქვთ. გარდა ამისა, აშშ ჩინეთს ახალი კორონავირუსის თაობაზე არაკეთილსინდისიერად ინფორმირებაში სდებს ბრალს. ჩინეთი, თავის მხრივ, უკმაყოფილოა ვაშინგტონის ჩარევით ქვეყნის საშინაო საქმეებში, კერძოდ, პეკინი–ჰონკონგის ურთიერთობებში.
