თბილისი, 3 ივნისი — Sputnik. ფინეთი მიმდინარე წელს 9 ათას სეზონურ მუშახელს ელოდება ქვეყნებიდან, რომლებიც არ შედიან ევროკავშირში, განაცხადა ქვეყნის სოფლისა და ტყის სამინისტროს წარმომადგენელმა სატუ ჰააპანიემიმ.
მანამდე ფინეთის ხელისუფლებამ 4,5 ათას კაცზე გამოყო კვოტა აღნიშნული ქვეყნების მოქალაქეებისთვის, თუმცა მაისის ბოლოს რაოდენობა გააორმაგა და 9 ათასამდე გაზარდა.
ჰააპანიემის თქმით, ევროკავშირის არაწევრი ქვეყნებიდან სეზონური მუშახელი ფინეთში შესვლას მხოლოდ იმ შემთხვევაში შეძლებს, თუ მათ ხელთ ექნებათ შესაბამისი ნებართვები ფინეთში შესვლასა და დასაქმებაზე.
„სეზონური მუშახელისთვის ნებართვების დიდი ნაწილი ფინეთის საიმიგრაციო სამსახურში მუშავდება. საბოლოო გადაწყვეტილებას ქვეყანაში შესვლაზე იღებს სასაზღვრო სამსახური“, — განმარტავს სამინისტროს წარმომადგენელი.
მისი თქმით, უცვლელი რჩება წესი, რომ ფინეთში ჩასულებმა აუცილებელი 14-დღიანი კარანტინი უნდა გაიარონ.
აღსანიშნავია, რომ ფინეთში სეზონურ სასოფლო-სამეურნეო სამუშაოებზე ყოველწლიურად ათასობით უცხოელი საქმდება. ამ პერიოდისთვის ქვეყნის ფერმერები მუშახელის მწვავე ნაკლებობას განიცდიან. საქმე ისაა, რომ ადგილობრივებს არ ხიბლავთ სეზონური მუშახელისთვის შეთავაზებული პირობები. მაგალითად, ფინეთში მარწყვის კრეფაზე დასაქმებულები საშუალოდ 8,5 ევროს იღებენ ერთ საათში, რაც ევროკავშირის ქვეყნებში მინიმალურ გასამრჯელოდ მიიჩნევა.
