თბილისი, 26 — Sputnik. ჯანდაცვის მსოფლიო ორგანიზაციამ შეაჩერა მალარიის საწინააღმდეგო პრეპარატ „ჰიქდროქსიქლოროქინის“, იგივე „პლაქვენილის“ გამოცდა, რომელიც კორონავირუსის სამკურნალოდ გამოიყენება, განაცხადა ჯანმოს გენერალურმა დირექტორმა ტედროს ადანომ გებრეიესუსმა.
მისი თქმით, აღნიშნული გადაწყვეტილება უკავშირდება კვლევის შედეგებს, რომლის თანახმადაც, კორონავირუსით ინფიცირებულთა შორის, რომლებსაც „ჰიქდროქსიქლოროქინით“ ან „ქლოროქინით“ მკურნალობდნენ „მაკროლიდთან“ (ანტიბიოტიკის სახეობა) კომბინაციაში, სიკვდილიანობის უფრო მაღალი მაჩვენებელი დაფიქსირდა.
ჯანმოს გადაწყვეტილებით ასევე შეჩერებულია „ქლოროქინის“ გამოცდაც.
„ეს ეხება მხოლოდ „ჰიდროქსიქლოროქინისა“ და „ქლოროქინის“ გამოყენებას COVID-19-ის სამკურნალოდ. გამოცდების სხვა ეტაპები კვლავ გრძელდება“, — განაცხადა გებრეიესუსმა.
ჯანმოს გენდირექტორის განმარტებით, „ჰიდროქსიქლოროქინიცა“ და „ქლოროქინიც“ „კვლავაც მიიჩნევა უსაფრთხოდ მალარიისა და აუტოიმუნური დაავადებების სამკურნალოდ“.
ჯანმოს განმარტებით, გადაწყვეტილებას უახლოესი ორი კვირის განმავლობაში გადახედავენ.
აღსანიშნავია, რომ საქართველოში COVID-19-ით დაავადებულთა სამკურნალოდ „რემდესივირთან“, „ლოპინავირ-რიტონავირთან“, აგრეთვე „ლოპინავირ-რიტონავირის“ „ბეტა-ინტერფერონთან“ კომბინაციასთან ერთად ასევე გამოიყენებოდა „პლაქვენილი“.