თბილისი, 13 სექტემბერი – Sputnik. სამ ქალს, რომლებიც ეჭვმიტანილი არიან საფრანგეთის დედაქალაქში გაზის ბალონებით სავსე ავტომობილის აფეთქების დაგეგმვაში, ბრალი წაუყენეს, იუწყება საინფორმაციო სააგენტო „რია ნოვოსტი“ სააგენტო „ფრანს პრესზე“ დაყრდნობით.
მანამდე ფრანგმა პოლიციელებმა პარიზის ღვთისმშობლის ტაძართან ახლოს, ავტომანქანების გაჩერებაზე უნომრო ავტომობილი აღმოაჩინეს, რომელშიც ავარიული სანათი ციმციმებდა. მანქანის სალონში ერთი ცარიელი, ხოლო საბარგულში – ექვსი სავსე გაზის ბალონი იდო. ავტომობილში ასევე იყო დოკუმენტები არაბულ ენაზე.
გასულ ხუთშაბათს პოლიციამ სამი ეჭვმიტანილი – 19, 23 და 39 წლის ქალი დააკავა. შსს–ს მონაცემებით, ისინი „ახალ ძალადობრივ შეტევებს“ ამზადებდნენ. ერთ–ერთ დაკავებულს ადრე „ისლამური სახელმწიფოს“ ერთგულების ფიცი აქვს დადებული.
როგორც სააგენტო პროკურატურაზე დაყრდნობით იუწყება, დაკავებული ქალები ასევე ეჭვმიტანილი არიან პარიზის ერთ–ერთ რკინიგზის სადგურზე ან პოლიციის განყოფილებაზე შეტევის დაგეგმვაში.