04:30 24 ოქტომბერი 2019
პირდაპირი ეთერი
  • EUR3.2965
  • 100 RUB4.6397
  • USD2.9661
სვანური კოშკი

მესტიისა და უშგულის კოშკებში შესაძლოა საოჯახო სასტუმროები გაიხსნას

© Sputnik / Denis Aslanov
ტურიზმი
მოკლე ბმულის მიღება
საქართველო - ტურისტული ცენტრი–2018 (408)
113 0 0

სვანური კოშკები იუნესკოს მსოფლიო მემკვიდრეობის ძეგლს წარმოადგენს.

თბილისი, 31 იანვარი — Sputnik. მიმდინარე წელს მესტიისა და უშგულის კოშკების რეაბილიტაცია იგეგმება, აღნიშნულია საქართველოს რეგიონული განვითარებისა და ინფრასტრუქტურის სამინისტროს მიერ გავრცელებულ განცხადებაში.

სვანური კოშკები ტურისტული საქართველოს ერთ-ერთი ყველაზე ცნობილი სიმბოლოა. ისინი VIII-დან XVIII საუკუნემდე პერიოდში იგებოდა და ხელით არის ნაშენები. კოშკები სიმაღლეში 20-28 მეტრს აღწევს.

„2019 წელს დაგეგმილია მესტიის ლაღამის უბანში კოშკების, მაჩუბებისა და გზის რეაბილიტაცია, ასევე უშგულის ოთხ სოფელში კოშკების რეაბილიტაცია. ეს საშუალებას მისცემს ადგილობრივ მოსახლეობას, რომ იქ გახსნან საოჯახო სასტუმროები და განავითარონ კერძო ბიზნესი", – განაცხადა ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა ეკონომიკურ კონფერენციაზე „საქართველო და მსოფლიო 2019".

მინისტრის ინფორმაციით, დასრულების ფაზაშია უშგულის ოთხი თემის გენგეგმაც, რომლის მიხედვითაც აღდგება არსებული კოშკები და მოწესრიგდება ინფრასტრუქტურა.

„ამ ეტაპზე იქ მოსაგვარებელია წყალმომარაგებისა და წყალარინების პრობლემა, ასევე ინტერნეტიზაცია. ეს აუცილებელია როგორც ადგილობრივი მცხოვრებლებისთვის, ასევე ბიზნესის განვითარებისთვის", – აღნიშნა ცქიტიშვილმა.

სვანური კოშკები იუნესკოს მსოფლიო მემკვიდრეობის ძეგლს წარმოადგენს. გარდა ამისა, 2011 წელს ქვის არქიტექტურის საერთაშორისო კონკურსზე (International Award Architecture in Stone) დაჯილდოვდა პრემიით „ხალხური არქიტექტურა".

ეკონომიკური კონფერენცია „საქართველო და მსოფლიო 2019" თბილისში 29 და 30 იანვარს გაიმართა. ღონისძიებას ესწრებოდა მთელი მსოფლიოს მასშტაბით ათასზე მეტი დელეგატი, მათ შორის, საქართველოში აკრედიტებული დიპლომატიური კორპუსის წარმომადგენლები. ღონისძიება საქართველოს პრემიერ-მინისტრმა მამუკა ბახტაძემ გახსნა.

 

თემები:
საქართველო - ტურისტული ცენტრი–2018 (408)

მთავარი თემები