თბილისი, 4 ივნისი — Sputnik. ბათუმში საზღვაო სეზონი გაიხსნა, ნათქვამია საგანგებო სიტუაციების მართვის სააგენტოს Facebook-გვერდზე განთავსებულ განცხადებაში.
საგანგებო სიტუაციების მართვის სააგენტომ სეზონის გახსნასთან დაკავშირებით ზღვაზე მაშველების მუშაობის შესახებ ფოტოები გამოაქვეყნა.
ადგილობრივი მასმედიის ინფორმაციით, სეზონის გახსნის აღსანიშნავად „ანბანის კოშკთან“ გამოვიდნენ ქართველი და უცხოელი დი-ჯეები Chiki, ლაშა გურული, გაბუნია, bedford falls, Groove Phoenix, Vako T.
პროგრამა საღამოს განაგრძო საკარნავალო შოუმ — ლათინოამერიკულმა ცეკვებმა, რომელიც წარმოადგინა ჯგუფმა Friedrichstadt Ballett. ზეიმი შუაღამის შემდეგ დასრულდა.
აჭარას 2017 წლის საზაფხულო სეზონზე ნახევარ მილიონზე მეტი უცხოელი სტუმრობდა, რაც 2016 წლის ანალოგიურ პერიოდთან შედარებით 25%-ით მეტია. სტუმრების განსაკუთრებით დიდი რაოდენობა აგვისტოში შეინიშნებოდა.
