თბილისი, 20 იანვარი - Sputnik. საქართველოში სწავლის გაგრძელების მსურველი სტუდენტებისათვის რეგისტრაცია დღეიდან იწყება, ინფორმაციას შეფასებისა და გამოცდების ეროვნული ცენტრი ავრცელებს.
საქართველოში სწავლის გაგრძელების მსურველმა პირებმა რეგისტრაციის თაობაზე 20 იანვრის 09:00 საათიდან 1 თებერვლის 18:00 საათამდე განცხადებით უნდა მიმართონ შეფასებისა და გამოცდების ეროვნულ ცენტრს ელექტრონულ მისამართზე gancxadebebi@naec.ge.
გამოცდისთვის დარეგისტრირება შეეძლებათ საქართველოს იმ მოქალაქეებს, რომლებიც სწავლობდნენ ან სწავლობენ საზღვარგარეთის უმაღლეს სასწავლო დაწესებულებებში და სწავლის პერიოდში ქვეყნის ფარგლებს გარეთ ერთი სემესტრის განმავლობაში მინიმუმ 75 დღე იმყოფებოდნენ.
სტუდენტები მხოლოდ ერთ გამოცდას ჩააბარებენ. გამოცდის წარმატებით ჩაბარება გულისხმობს ტესტისთვის განსაზღვრული მაქსიმალური ქულის 50%-ზე მეტის (მინიმუმ 23 ქულა) დაგროვებას.
დეტალური ინფორმაცია, ასევე შესავსები განცხადების ფორმა და ტესტის ნიმუში გამოცდის ჩაბარების მსურველებს შეუძლიათ იხილონ აქ.
გამოცდის თარიღისა და ჩატარების ადგილის თაობაზე დეტალური ინფორმაცია რეგისტრაციის დასრულების შემდეგ გამოქვეყნდება შეფასებისა და გამოცდების ეროვნული ცენტრის ვებგვერდზე.
გასულ წელს საქართველოში სწავლის გაგრძელების უფლება სხვადასხვა ქვეყნის უმაღლესი სასწავლებლის 22-მა სტუდენტმა მიიღო.
