ზუგდიდში საარჩევნო უბანთან „ქართული ოცნებისა“ და „ნაცმოძრაობის“ წარმომადგენლებმა იჩხუბეს

თბილისი, 31 ოქტომბერი - Sputnik. რამდენიმე ადამიანი დაშავდა ზუგდიდში ერთ-ერთ საარჩევნო უბანთან მომხდარი ჩხუბის შედეგად, იუწყება ტელეკომპანია „რუსთავი 2“.

ზუგდიდის მე-80 საარჩევნო უბანთან „ქართული ოცნება -დემოკრატიული საქართველოსა“ და „ერთიანი ნაციონალური მოძრაობის“ წარმომადგენლები ერთმანეთს ფიზიკურად დაუპირისპირდნენ.

მმართველი პარტიისა და ოპოზიციის წარმომადგენლებს შორის ჩხუბი მას შემდეგ დაიწყო, რაც „ნაციონალურმა მოძრაობის“ წევრმა უბანთან მერიის ერთ-ერთი თანამშრომელი დაინახა და მმართველი პარტიის საჯარო მოხელეები აგიტაციაში დაადანაშაულა. მმართველი პარტიის წარმომადგენლის განცხადებით კი ის ამ საარჩევნო უბანთან ახლოს ცხოვრობს.

ტელეკომპანიის ცნობით, ამ დროისთვის მე-80 საარჩევნო უბანთან ვითარება განმუხტულია.

2020 წლის საპარლამენტო არჩევნები საქართველოში შერეული სისტემით ტარდება. ქვეყნის მოსახლეობამ 150 დეპუტატი უნდა აირჩიოს საკანონმდებლო ორგანოში — 120 პროპორციული და 30 მაჟორიტარული წესით. მეათე მოწვევის პარლამენტის არჩევნებში 48 პარტია და ორი საარჩევნო ბლოკი მონაწილეობს.