თბილისი, 16 ოქტომბერი – Sputnik. გაეროს გენერალური მდივნის და ვაქცინებისა და იმუნიზაციების გლობალური ალიანსის მრჩეველი, პროფესორი გიორგი ფხაკაძე ვარაუდობს, რომ კორონავირუსის მეორე ტალღის პიკი დეკემბრის ბოლოს იქნება.
აჭარამ „ლიდერობა“ დაიბრუნა – კორონავირუსის ბოლო შემთხვევები რეგიონების მიხედვით>>
როგორც მან „რუსთავი2“-ის ეთერში განაცხადა, ეს ვარაუდი ეფუძნება ე.წ. „ისპანკის“ ეპიდემიის განვითარებას, რომელიც მსოფლიოში 1918–1919 წლებში მძვინვარებდა და რომლის ტალღების განვითარებაც, ფხაკაძის განცხადებით, ძალიან ჰგავს COVID-19-ის განვითარებას.
„რომ შეხედოთ დროს, აბსოლუტურად ერთი-ერთში ჯდება. იწყება ოქტომბერში, დეკემბრის ბოლოს იქნება პიკი, დეკემბრის ბოლოდან უკვე ჩამოდის ქვემოთ და მესამე, პატარა ტალღა იქნება დაახლოებით აპრილი-მაისში", – განაცხადა გიორგი ფხაკაძემ.
საქართველოში კორონავირუსის ახალი შემთხვევები მკვეთრად გაიზარდა. 16 ოქტომბრის მონაცემებით, ინფიცირებულთა რაოდენობაა 15 327, გამოჯანმრთელდა 7 613, გარდაიცვალა 124 პაციენტი.
კორონავირუსის პირველი შემთხვევა საქართველოში 26 თებერვალს დაფიქსირდა.
