თბილისი, 8 აგვისტო - Sputnik. ლევან სამხარაულის სახელობის ექსპერტიზის ეროვნულ ბიუროში გარდაცვლილი თამარ ბაჩალიაშვილის მობილური ტელეფონის ექსპერტიზა მიმდინარეობს, იუწყებს ტელეკომპანია Rustavi2.
23 წლის თამარ ბაჩალიაშვილი ხუთი დღის ძებნის შემდეგ თეთრიწყაროს რაიონში, საკუთარ ავტომობილში გარდაცვლილი იპოვეს. ის სახლიდან 18 ივლისს გავიდა და უკან აღარ დაბრუნებულა.
ექსპერტებმა უნდა ნახონ, რა ინფორმაცია ინახება ტელეფონში და ვისთან ჰქონდა თამარ ბაჩალიაშვილს ბოლოს კომუნიკაცია.
როგორც ბაჩალიაშვილის ოჯახის ადვოკატმა მიხეილ რამიშვილმა განაცხადა, გარდაცვლილის კუთვნილი მობილური ტელეფონი მის თვალწინ დაილუქა.
„დავაკვირდებით, თუ როგორ იქნება ეს პროცედურები ჩატარებული. მეც ახლა უნდა ვნახო, რა მდგომარეობაშია მობილური ტელეფონი, რადგან ის ჩემს თვალწინ დაილუქა იმ დროს, როდესაც ავტომობილიდან ამოიღეს. შესაბამისად, ლუქზე ჩემი ხელმოწერა იყო დაფიქსირებული. მსგავსი რამ ლეპტოპზე არ ყოფილა, რადგან ის საქმეში ჩემს ჩართულობამდე ამოიღეს,"- განაცხადა რამიშვილმა.
რამდენიმე დღის წინ შსს-მ გოგონას კუთვნილი ნოუთბუქის ექსპერტიზის შედეგები გაასაჯაროვა, რომლის თანახმადაც გოგონა სუიციდზე ფიქრობდა და თვითმკვლელობის მეთოდების შესახებ ინფორმაციას ეძებდა.
თავდაპირველად ბაჩალიაშვილის გაუჩინარებაზე საქმე აღძრული იყო თავისუფლების უკანონო აღკვეთის მუხლით, თუმცა შემდეგ კიდევ ერთი მუხლი – თვითმკვლელობამდე მიყვანა დაემატა.
შესაძლო თვითმკვლელობის ვერსიას გამოძიება იმ ფაქტის გათვალისწინებით განიხილავს, რომ სხეულის წინასწარმა დათვალიერებამ ტრავმები და ჭრილობები არ გამოავლინა. ასევე ეჭვს იწვევს ის, რომ ავტომობილში ცხედრის ნივთებში ნაპოვნ წამლებს 20 აბი აკლია. მანქანაში იპოვეს ჩანაწერიც „თანხა ანგარიშზეა, გამოიყენეთ“.
