თბილისი, 29 ივლისი — Sputnik. საქართველოში ეპიდემიოლოგებს ენდობიან, თუმცა სჯერათ კორონავირუსის შესახებ „შეთქმულების თეორიისაც“, ნათქვამია აშშ-ის ეროვნული დემოკრატიული ინსტიტუტის (NDI) მიერ ჩატარებულ კვლევაში.
NDI-მ ივნისში ჩატარებული საზოგადოებრივი აზრის კვლევის შედეგები წარმოადგინა, რომელიც, მათ შორის, კორონავირუსის პანდემიას და მის შესახებ ინფორმაციას ეხებოდა.
როგორც აღმოჩნდა, კორონავირუსთან დაკავშირებით საქართველოს მოსახლეობისთვის ინფორმაციის მიღების ერთ-ერთი ძირითადი წყარო ტელევიზია იყო, ასეთია გამოკითხულთა 84%. მეორე ადგილზეა სოციალური ქსელები (41%), მესამე ადგილზე კი ახლობლები, მეზობლები და თანამშრომლები (26%).
ამასთან, ტელევიზია პოპულარული აღმოჩნდა ყველა ასაკობრივ ჯგუფში. სოციალურ ქსელებსა და ინტერნეტს, როგორც კორონავირუსის შესახებ ინფორმაციის წყაროს, ძირითადად 18-დან 34 წლამდე ასაკის ადამიანები იყენებდნენ.
კვლევამ ასევე დაადგინა, რომ საქართველოში ინფექციის შესახებ ყველაზე მეტად (90%) დაავადებათა კონტროლისა და საზოგადოებრივი ჯანმრთელობის ეროვნული ცენტრიდან გავრცელებულ ინფორმაციას ენდობიან, მეორე ადგილზეა მთავრობა (85%), მესამე ადგილზე კი მასმედია (73%).
მითები კორონავირუსზე
NDI-ს წარმომადგენლებმა ასევე შეამოწმეს ადამიანების დამოკიდებულება კორონავირუსის შესახებ სხვადასხვა თეორიებსა და აღნიშნულ თემაზე გავრცელებულ დეზინფორმაციასთან დაკავშირებით.
კვლევის შედეგებით, გამოკითხულთა 60% მიიჩნევს, რომ შეუძლია ინფექციასთან მიმართებით ტყუილის სიმართლისგან გარჩევა, საწინააღმდეგო აზრისაა 33%. დანარჩენებმა განაცხადეს, რომ კითხვაზე პასუხი არ აქვთ.
ამასთან, გამოკითხულთა 58% მიიჩნევს, რომ კორონავირუსის შესახებ გავრცელებული ინფორმაციის ნაწილი სიცრუეა. დეზინფორმაციასთან შეხება არ ჰქონია 19%-ს, ინფორმაციის უმეტესობას ტყუილად მიიჩნევს 15% და მხოლოდ 8%-მა განაცხადა, რომ კითხვაზე პასუხი არ აქვს.
გამოკითხვაში მონაწილე პირებმა თავიანთი დამოკიდებულება დააფიქსირეს სხვადასხვა ინფორმაციასთან დაკავშირებითაც.
მითი პირველი: კორონავირუსის წარმოშობა
საქართველოში გამოკითხულთა მესამედმა არ იცის საიდან წარმოიშვა კორონავირუსი, კიდევ ერთი მესამედი თვლის, რომ ვირუსი ლაბორატორიაში შექმნეს და სპეციალურად გაავრცელეს.
22%-ს მიაჩნია, რომ ვირუსი ლაბორატორიაში შექმნეს და შემთხვევით გაავრცელეს, ხოლო 13%-ს სჯერა, რომ იგი ბუნებრივი გზით წარმოიშვა. 3%-ს საერთოდ არ სჯერა ვირუსის არსებობის.
ამავე დროს, გამოკითხულთა 73% თვლის, რომ საქართველოში ვირუსის გავრცელებისა და სიკვდილიანობის დაბალი მაჩვენებელი ხელისუფლების სწორი მოქმედების შედეგია, 17% ამაში გენეტიკისა და რელიგიის დამსახურებას ხედავს, დანარჩენს კი პირველი ორი თეორიისგან განსხვავებული მოსაზრება აქვს.
მითი მეორე: კორონავირუსს ლუგარის ლაბორატორია ავრცელებს
გამოკითხვამ აჩვენა, რომ მხოლოდ გამოკითხულთა 4%-ს სჯერა, რომ თბილისის გარეუბანში მდებარე ლუგარის ლაბორატორია ხელს უწყობს კორონავირუსის გავრცელებას, 6%-ს კი მასზე საერთოდ არაფერი სმენია.
ბრძოლა კორონავირუსთან: საქართველოს მოქალაქეები მთავრობის მუშაობით კმაყოფილები არიან>>>
66% თვლის, რომ ლუგარის ლაბორატორია კორონავირუსის გავრცელებას ხელს უშლის.
დანარჩენს კითხვაზე პასუხი არ ჰქონდა.
მითი მესამე: ხალხური მედიცინა
გამოკითხვის შედეგებით, საქართველოში 78%-ს არ სჯერა, რომ კორონავირუსთან ბრძოლაში ხალხური მედიცინა ეფექტურია.
ხალხური მედიცინის სხვადასხვა მეთოდების ზეგავლენის სჯერა 19%-ს.
მითი მეოთხე: რწმენა შველის
გამოკითხვის შედეგების თანახმად, საქართველოში 53%-ს სჯერა, რომ რწმენას კორონავირუსისგან დაცვა შეუძლია. საწინააღმდეგო აზრისაა გამოკითხულთა 38%, 9%-ს კი პასუხი არ აქვს.
მითი მეხუთე: 5G და კორონავირუსი
იმის გასაგებად, თუ რამდენად სჯერათ საქართველოში კორონავირუსის გავრცელებაზე 5G-ს ზეგავლენის შესახებ თეორიის, მკვლევარებმა ქვეყნის მოსახლეობას დაუსვეს კითხვა: „ეთანხმებით, რომ 5G-ს ინფრასტრუქტურა უკავშირდება კორონავირუსის გავრცელებას?“.
შედეგების თანახმად, გამოკითხულთა 16%-მა საერთოდ არ იცის 5G-ს შესახებ, 45% არ ეთანხმება ამგვარ მოსაზრებას, 10% – ეთანხმება, ხოლო 30% აცხადებს, რომ არ იცის პასუხი ამ კითხვაზე.
NDI-ს გამოკითხვა 26–30 ივნისის პერიოდში ჩატარდა. ტელეფონით 1550 ადამიანი გამოიკითხა. გამოკითხვის ცდომილება +/–2%-ს შეადგენს.
