10:31 03 ივნისი 2020
პირდაპირი ეთერი
  • EUR3.4366
  • 100 RUB4.4862
  • USD3.0772
საზოგადოება
მოკლე ბმულის მიღება
კორონავირუსმა საქართველომდეც მოაღწია: ბოლო ცნობები (849)
13420

დეკანოზის თქმით, აღდგომის წინა პერიოდში ხელისუფლების წარმომადგენლებთან შეხვედრა გაიმართება, რომელზეც აღდგომის დღესასწაულთან დაკავშირებით კონკრეტულ გადაწყვეტილებებს მიიღებენ.

თბილისი, 6 აპრილი – Sputnik. კომენდანტის საათის დროს მორწმუნე უნდა იყოს სახლში, თუმცა ჩვენ სააღდგომოდ ველოდებით, რომ სიტუაცია განიმუხტება, განაცხადა საპატრიარქოს პრეს-სამსახურის ხელმძღვანელმა, დეკანოზმა ანდრია ჯაღმაიძემ „პალიტრანიუსის“ ეთერში. 

საქართველოში კორონავირუსის გავრცელების პრევენციის მიზნით 21 მარტიდან 21 აპრილამდე საგანგებო მდგომარეობა გამოცხადდა, 31 მარტიდან კი საკარანტინო რეჟიმი და კომენდანტის საათი ამოქმედდა. შესაბამისად, ქვეყანაში სრულად აიკრძალა ნებისმიერი ტიპის საზოგადოებრივი ტრანსპორტით, მათ შორის, მეტროთი გადაადგილება. ერთ-ერთი შეზღუდვა სამ კაცზე მეტი პირის შეკრების აკრძალვაა.

მართლმადიდებელი სამყარო 19 აპრილს აღდგომის ბრწყინვალე დღესასწაულს აღნიშნავს. ეს ერთ-ერთი ყველაზე მასშტაბური დღესასწაულია საქართველოში – ათასობით მორწმუნე აღდგომის ღამეს ტაძრებში ხვდება. მომავალი ორი კვირა მორწმუნეთათვის ყველაზე მნიშვნელოვანია – 7 აპრილს ხარებაა, 12 აპრილს – ბზობა, 17 აპრილს – წითელი პარასკევი.

„ჩვენ სააღდგომოდ არ გვაქვს მიღებული გადაწყვეტილება – როგორ შევძლოთ მსახურება სრულფასოვნად, რომ მრევლთან ერთად აღესრულოს და ამავდროულად არ დაირღვეს კომენდანტის საათი. კომენდანტის საათის დროს მორწმუნე უნდა იყოს სახლში, თუმცა ჩვენ სააღდგომოდ ველოდებით, რომ სიტუაცია განიმუხტება. უნდა შევხედოთ, რა ვითარება იქნება იმ დროისათვის“, – აღნიშნა ანდრია ჯაღმაიძემ. 

დეკანოზის თქმით, აღდგომის წინა პერიოდში ხელისუფლების წარმომადგენლებთან შეხვედრა გაიმართება, რომელზეც აღდგომის დღესასწაულთან დაკავშირებით კონკრეტულ გადაწყვეტილებებს მიიღებენ.

„მორწმუნემ მხედველობაში უნდა მიიღოს ის რეკომენდაციები, რაც ხელისუფლებიდან და ჯანდაცვის მესვეურთაგან მოდის. ეს ხალხი ნდობას იმსახურებს, იმიტომ რომ მათი მუშაობა ეფექტურია და შეგვიძლია ვენდოთ მათ. ჩვენ ხელისუფლებასთან ამაზე აუცილებლად გვექნება საუბარი – რა შეიძლება შევთავაზოთ ხელისუფლებას და რას შეიძლება ველოდოთ მათგან სიტუაციის მიხედვით“, – აღნიშნა ჯაღმაიძემ.

ადრე საპატრიარქოში გადაწყდა, რომ 4 აპრილიდან წირვები ჩატარდება კომენდანტის საათის გათვალისწინებით და 20:00 საათიდან ეკლესიები დაიკეტება.

საქართველოს მთავრობის სპეციალურ ვებ-გვერდზე stopcov.ge. გავრცელებული ინფორმაციით, ქვეყანაში კორონავირუსით ინფიცირებულთა რაოდენობამ 188-ს მიაღწია, გამოჯანმრთელდა 36 ადამიანი, გარდაიცვალა ორი, კარანტინის რეჟიმში იმყოფება 5056, ხოლო სტაციონარებში დაკვირვების ქვეშ 386 პაციენტია.

თემები:
კორონავირუსმა საქართველომდეც მოაღწია: ბოლო ცნობები (849)

მთავარი თემები