თბილისი, 2 დეკემბერი — Sputnik. წამყვანმა ამერიკულმა კინოსტუდიებმა Disney, Netflix, Paramount Pictures, Sony Pictures, Universal City Studio და Warner Bros აღშფოთება გამოთქვეს საქართველოს ვებ-გვერდებზე კინოპროდუქციის უკანონო განთავსების გამო, იუწყება ქვეყნის კინემატოგრაფიის ეროვნული ცენტრი.
ამასთან დაკავშირებით გავლენიან ჰოლივუდურ კინოსტუდიებს საქართველოსთვის გარკვეული სანქციების დაწესება შეუძლიათ.
„წამყვანი ამერიკული კინოსტუდიები საქართველოს ერთგვარ გაფრთხილებას უგზავნიან. წერილში, რომელიც 4 ნოემბერს საქართველოს ინტელექტუალური საკუთრების ეროვნულ ცენტრს გამოეგზავნა, წერია, რომ ქართული ვებ-გვერდები წლების განმავლობაში უკანონოდ მოიპოვებენ და სხვადასხვა ფილმებს ასაჯაროებენ, რაც სერიოზულ პრობლემას წარმოადგენს", – ნათქვამია კინოცენტრის განცხადებაში.
წერილის მთავარი ადრესატი ორი ქართული ინტერნეტ-გვერდია – Adjarabet და iMovies.
კინომეკობრეობის პრობლემის გადასაჭრელად საქართველოში შეიქმნა ასოციაცია „ინტერნეტ-მეკობრეების წინააღმდეგ". მისი წევრები ქართულ ვებ-გვერდებზე კინოპროდუქციის კანონიერ განთავსებასთან დაკავშირებით სოციალური კამპანიის დაწყებას აპირებენ.
ამას გარდა, ამჟამად მზადდება სპეციალური ვიდეოკლიპი, რომელიც არალეგალური ფილმების ჩვენების გამო ქვეყნის ეკონომიკისთვის ზიანის შესახებ მოგვითხრობს.
